Reklama
Pòłożą widowód pòd arkticznym lodã
18/02/2026 10:34
Miast cygnąc kable wkòl biegùna abò zdłuż sztrądów, wëbrelë nôkrótszą mòżebną drogã. Badérowie wskazéwają, że w dalszi perspektiwie bãdze to nawet bezpieczniészé.
Szwédzkô chce pòłożëc do Azje nowi widowód nôkrótszą mòżlëwą drogą – pòd lodama Arkticzi. Z Kirunë na nordze Szwédzczi przewód mô sã cygnąc do Norwesczi, dali przez Svalbard i Arkticzny Òcean jaż na azjaticką starnã. Bãdze to kòl dzesãc i pół tësąca kilométrów, a inwesticjô mó kòsztac dwadzesce jeden miliardów szwédzczich kòrun – równoznaczënã kòl òsmë miliardów trzësta sztërdzescë miliónów złotëch. Widowód bãdze włączony w wikszą séc w òbrëmim òglowònordicczégò projektu Polar Connect, chtëren mô sparłãczëc ze sobą Szwédzkã, Norweskã, Kanadã, Alaskã, Japóniã i Pôłniową Kòrejã. Generalnô direktórka szwédzczi Radzëznë Nôùkòwëch Badérowaniów Katarina Bjelke przekôzała, że kabel mòże bëc ùmëslno pòprowadzony na taczi ôrt, żebë nôtërné grëbé wiôrztë lodu ùtrëdniwałë przëstãp do kabla sabòtażistóm. Wszëtkò mô sã dzejac z nôwëższima sztandardama szacënkù dlô nôtërnégò strzodowiszcza. Do sami infrastrukturë bãdą téż doczépioné specjalné miarë temperaturë i zasoleniégò wòdë, z czegò bãdze ùżiwk dlô badérów Arkticznégò Òceanu. Eùropejskô Kòmisjô mô ùznóné tã inwesticjã za strategiczno wôżną. Czerownicë projektu Polar Connect gôdają, że pierszé dóné nowim widowòdã bãdą przesłóné w dwa tësące trzëdzestim rokù.
H.S.Sz.
Reklama
Komentarze opinie
Podziel się swoją opinią
Twoje zdanie jest ważne jednak nie może ranić innych osób lub grup.
Reklama
Wideo
Reklama
Komentarze