Stacjô Gare du Nord mùszała òdwòłac wnetka piãcset banów, co dotkło kòl szescset tësący pasażérów.
W piątk sódmégò strëmiannika w pòdparisczi môlëznie Saint-Denis robòtnicë nalezlë półtonową latawną bómbã z drëdżi swiatowi wòjnë pòd sztrëką prowadzącą do Gare du Nord, jednégò z przédnëch banowiszczów Pariza. Bómba, w chtërny bëło dwasta kilogramów wëbùchowégò ladënkù, bëła kòl dwa i pół kilométra òd stacje. W związkù z brëkòwnotą rëmniãcô niewëbùchù, na banowiszczu strzimelë rësznotã chùtczich banów TGV, banów eùropejsczich liniów Eurostar, a téż regionalnëch i aglomeracjowëch. Bómbã ùdało sã rëmnąc spòd sztrëczi, a rësznota banów bëła przëwrôcónô òd szósti pò pôłnim. Banë na linie Pariz-Londin miałë bëc ùrësznioné dopiérze w sobòtã, przez co pasażéróm z Londinu, co chcelë jachac na weekend do Pariza, òstało wëbrac trasã do Lille na nordze Francje i stamtądka szëkac jinszich sparłãczeniów z francëską stolëcą, abò miast cugù wëbrac fliger.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie