Reklama

Premiérka jak aniół?

Klëka

01/02/2026 12:14

Òdj. Bazylika Swiãtégò Wawrzińca in Lucina

Minister kùlturë Italsczi wësłôł lëdzy do przëzdrzeniô sã kòntrowersjowémù freskòwi. Òpòzycjô gôdô, że òn wëzdrzi za terną premiérką.

W Rzimie pò niedôwnym zalenim òdnôwielë fresczi w Bazylice Swiãtégò Wawrzińca „in Lucina”. Ùwôgã òpòzycjowëch italsczich mediów zwrócëłë te nad stojącą w kòscele piersną sztaturą króla Humberta II. Tam jeden z aniołów dostôł wedle nich gãbã premiérczi Giorgie Meloni, przédniczczi nôrodnokònserwatiwny partie Bracô Italsczi. Gazéta „La Repubblica” òpùblikòwała òdjimczi freskù przed i pò renowacją. Gazétnicë napiselë, że przódë aniół wëzdrzôł jak zwëczajny cherub. Centrolewiznowô Demòkraticznô Partiô wezwała ministra kùlturë Alessandro Giuliégò do przëzdrzeniô sã sprawie. Ten w sobòtã trzëdzestégò pierszégò stëcznika ògłosył, że ju zlecył inszpekcjã swiãtnicë. Tegò samégò dnia sama Giorgia Meloni ùprzëstãpniła òdjimk anioła na swòjim Instagramie. „Nié, jô na gwës nie wëzdrzã za aniołã” – napisała, i doparłãczëła emòtikònã smiéchù. Probòszcz bazyliczi Daniele Micheletti scwierdzył, że pò prôwdze widzy szlachòtã midzë gãbą anioła a premiérką. Pòdsztrëchnął téż, że te fresczi akùrôt nie bëłë òbjimniãté òchróną spôdkòwiznë, bò jich òriginał béł z dwatësãcznégò rokù. Kònserwatór Bruno Valentinetti téż zaprzékòwôł temù, żebë chcôł przez swój dokôz ùbezsmiertnic Meloni. Rzekł, że wrócył leno aniołowi òriginalny wëzdrzatk sprzed dwadzesce piãc lat.

Źródło i opracowanie własne