Reklama

Premiérka Tajlandie stracëła stanowiszcze za gôdkã z „wùją”

Klëka

31/08/2025 11:31

Paetongtarn z amerikańsczim sekretérą stanu Antonym J. Blinkenã w 2024 r. Òdj. U.S. Department of State

Przëstojnicë pòliticzczi cwierdzą, że tribùnał chcôł zaszkòdzëc pòliticzny dinastie Shinawatrów, jakô dała Tajlandie ju troje premiérów.

Kònstitucjowi Tribùnał Tajlandie zadecydowôł ò rëmniãcym z ùrzãdu premiérczi Paetongtarn Shinawatrë za to, że w czerwińcù zwòniła do Hun Sena, ùszłégò premiéra Kambòdżë i òjca ternégò wódcë tamecznégò rządu. Ji zawiészenié w òbrzészkach dérowało ju òd zôczątkù lëpińca. W gôdce z kambòdżańsczim liderã miała gò nazewac wùją – Hun Sen béł blisczim drëchã ji òjca Thaksina Shinawatrë, jaczi béł premiérã Tajlandie òd dwa tësące pierszégò do dwa tësące szóstégò rokù – a téż kritikòwac tajską armiã i pòdważac nôrodny interes Tajlandie. Wëcék rozmòwë miôł pòchadac òd samégò Hun Sena. Premiérka barniła sã tłómaczącë, że ji célã bëło òbgôdanié mòżebnosców mirnégò rozrzeszeniô cygnącégò sã sztridu midzë Tajlandią a Kambòdzą, chtëren kùreszce pòd kùńc lëpińca pòskùtkòwôł wëbùchã piãcdniowëch biôtków òkòma grańcë. Sãdzowie nie delë ji wiarë i głosama szesc do trzech doprowadzëlë do ji zéńscô z ùrzãdu. Paetongtarn Shinawatra stała sã piątą głową rządu zdjimniãtą na taczi ôrt òd dwa tësące ósmégò rokù.

Czytaj nas w Google

Dodaj do Google

Źródło i opracowanie własne