Reklama

Prezydent Kamerunu zaczinô ósmą kadencjã

Klëka

28/10/2025 13:58

Paul Biya; United States Department of State Africa U.S.-Africa Leaders Summit: Photos and Videos - https://www.state.gov/africasummit/photos/; zdrzódło: https://pl.wikipedia.org/wiki/Paul_Biya#/media/Plik:Paul_Biya_in_December_14th,_2022.jpg

Kadencjô prezydenta w Kamerunie dérëje sétmë lat. Jeżlë tëli Paul Biya przetrzimie, pòd ji kùńc bãdze sztót przed setką.

Kònstitucjowô Radzëzna Kamerunu ògłosëła w pòniedzôłk dwadzestégò sódmégò rujana, że latosé prezydencczé welacje dobéł Paul Biya, reprezentant i przédnik rządzący partie, Demòkraticznégò Zgromadzeniégò Kameruńsczégò Nôrodu. Dobéł piãcdzesąt trzë i sétmë dzesątëch procenta głosów. Dzewiãcdzesąt dwa lata stôri Paul Biya wchôdô prawie w swòjã ósmą kadencjã. Jeżlë dożdô ji kùńca, bãdze miôł dzewiãcdzesąt dzewiãc lat i wedle kameruńsczégò prawa bãdze mógł kandidowac w pòstãpnëch welacjach. Rządzący bez paùzë òd tësąc dzewiãcset òsmëdzesątégò drëdżégò rokù prezydent w dwa tësącë ósmim zniósł limit kadencjów dlô głowë państwa. Je nôdłużi rządzącym i nôstarszim prezydentã na swiece. Wedle òpòzycje òb całą kampaniã pùbliczno pòkôzôł sã leno rôz. Łoni pò klaprach ò jegò smiercë rząd zakôzôł pùblicznégò diskùtérowaniô ò jegò zdrowim, chòc w praktice zôkôz biwô czãsto łómóny przez media. Pòlitik wiele czasu przebiwô w eùropejsczich bòlëcach. Jegò kòntrkandidat, Issa Tchiroma Bakary z Kameruńsczégò Frontu Nôrodnégò Wëbawieniô, gôdô, że rządzącô partiô pòstãpny rôz maniła wkół welacjów. Pòdôł téż, że pò ògłoszenim wëników do grëpë jegò przëstojników zgromadzonëch pòd jegò dodomã chtos strzélôł i zabił dwie òsobë. W weekend przed ògłoszenim wëników welacjów òb czas demònstracjów òpòzycje w gardze Duala zdżinãło sztërzech lëdzy.

H.S.Sz.