Atakòwnik òbeszedł kòntrolã i wniósł na pòkłôd nóż, ale jeden z pasażérów miôł na to cos lepszégò.
We czwiôrtk sétmënôstégò łżëkwiata môłi fliger linie Tropic Air wiózł sztërnôsce pasażérów z gardu Corozal w nordowim Belize do stolëcë tegò państwa, Belize City. Jednym z pasażérów béł sztërdzescëdzewiãclatny amerikańsczi wòjnowi weteran i ùszłi szkólny, Akinyela Sawa Taylor. Ten krótkò pò starce wëjął nóż i zaczął sã domagac òd pilota, żebë zmienił czerënk lecbë i wëwiózł gò z kraju. Zachòwiwôł sã agresywno, nożã zrenił trzë òsobë. Pilot zaczął latac fligrã w tã i nazôd midzë nordą a westrzódkã Belize i zachòwiwającë zëmną krew dôł wiadã ò pòrwanim służbóm. Te kòntaktowałë sã tekstowò z jednym z pasażérów, jaczi pisôł jim, co sã dzejô na pòkładze. Służbë na latawiszczach stanãłë w pòszëkù. Òstôł téż wësłóny specjalny helikòpter, jaczi miôł miec bôczenié na pòrwóny fliger z lëftu. We fligrze zaczął sã kùńczëc òpôł. Atakòwnik dali béł agresywny. Tedë jeden òd zrenionëch pasażérów wëcygł dotądka schòwóny pistól i pòstrzélił pòriwôcza. Zarô pòtemù pilot wëlądowôł na przedgardzym Belize City, skądka zrenionëch i atakòwnika retownicë zabrelë do bòlëcë. Taylor nie przeżił pòstrzału. Służbë wëwiedzałë sã, że w ùszłi weekend nie dostôł pòzwòleniô na wjôzd do Belize, ale ni ma wiedzec jak w kùńcu ùdało mù sã dostac do kraju. Służbë mùszą téż sprawdzëc jak pòriwôcz wniósł na pòkłôd fligra nóż, a pasażéra strzélną barniã – nôgwësni prosto nie òstelë dobrze sprôwdzony na latawiszczu, bò w Belize nié wiedno są na to warënczi.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie