Reklama

Procëm pamiãtnikòwi bùdownika Sopòtu

Klëka

28/11/2025 16:37

Kaplëczka Stella Maris w Sopòce z 1928, zaprojektowónô przez Paùla Pùchmüllera. Òdj. Ewa Jaros (czupirek); zdrzódło: https://pl.wikipedia.org/wiki/Paul_Puchm%C3%BCller#/media/Plik:Sopot,_Stella_Maris_shrine_01.jpg

Paùl Pùchmüller swòją ùdbą na przesztôłcenié Sopòtu w richtich gard chcôł zgermanizowac pòlsczé lëdztwò – tak gôdają procëmnicë ùdbë pòstawieniô mù pamiãtnika.

We czwiôrtk dwadzestégò sódmégò smùtana na sesje Miesczi Radzëznë w Sopòce pòrëszonô bëła téma pòstawieniô w gardze pamiãtnika Paùla Pùchmüllera. To béł architekt, jaczi przez dwadzesce jeden lat robił jakno miesczi bùdownik Sopótu. Dlô przëbôczeniô człowieka, co dzãka niemù Sopòt mô swój dzysdniowi wëzdrzatk, sztërë lata nazôd béł przëjimniãti ùchwôlënk ò zgrôwanim do bùdacje pamiãtnika niedalek Ùrzãdu Gardu. Wicemarszôłk Môrcën Skwierawsczi z Sopòtu na slédny sesje przëbôcził, że ùdba architekta pòchôdającégò ze Słëpska na zaprojektowanié miasta je tim, co do dzys apartni Sopòt na Pòmòrzu i w Pòlsce. Nalazło sã równak karno procëmników przëwdarzeniô bùdownika. Przédniczką òpòzycje je pòsélcka Dorota Arcyszewskô-Mielewczik jakô pòdsztrichnãła, że Pùchmüller béł państwòwim ùrzãdnikã prësczi administracje, jegò projekt miôł na célu zgermanizowac Sopòt i pòkazac wëższosc niemiecczi kùlturë nad pòlską, a téż pilowôł, żebë Pòlôszë w Sopòce nic ni mòglë stawiac. Zapòwiedzała téż, że pùdze do sejmù z bédënkã pòprôwczi do ùstawù zakazéwającégò promòwaniô faszizmù, nazyzmù i kòmùnizmù – do tegò chce doparłãczëc kwestiã państwów, jaczé sprawiłë zagôrënczi Pòlsczi. Na sesje Miesczi Radzëznë równak ùchwôlënk òpòzycje, wedle jaczégò wëszëznë miałëbë òdéńc òd ùdbë ùpamiãtnieniô Pùchmüllera, òstôł òdrzucony wikszoscą głosów.

H.S.Sz.

Aktualizacja: 28/11/2025 16:43