Szandarzë jesz rôz pòdjimają sprawã nalazłégò w Drzewinach na Kòcewim cała białczi zamòrdowóny w 2009.
Regionalnô Prokùratura we Gduńskù pò 15 latach òd wëgaszeniô znowiła wëdowiédzã w sprawie mòrdarstwa w gminie Wiôldżé Trąbczi. W łżëkwiace 2009 r. we wsë Drzewina szpacérëjący turiscë z Gdinie nalezlë w stawie fòliowi miech, w chtërnym béł schòwóny nadżi srąb młodi białczi bez głowë, nogów i dłoni. Cało bëło òwité metalowim lińcuchã. Tedë szandarzë pò przezérkach cała doznelë sã, że kùńcowinë i głowa zamòrdowóny mùszałë òstac òdcãté òstrim nożã abò żôgą ju pò smiercë òfiarë, do chtërny mùszało duńc òd trzech do dzesãc dni przed ji nalézenim. Nie ùdało sã równak doznac kògùm bëła białka, ani chto jã zabił.
Terô pò półtori dekadë pòdszukòwny jesz rôz przezdrzelë zebróné dokazë i zadecydowelë ò znowienim wëdowiédzë. Jesz rôz przeszukelë stôw w Drzewinie. Chcą téż wrocëc do badérowaniô cała, żebë doznac sã jawernotë białczi. Pòdszukòwny proszą kòżdégò, chto mòże miec infòrmacje wôrtné dlô sprawë, ò zgłosziwanié sã pòd numrë 477 415 861 abò 691 420 551. Zgłosziwającym mdze zagwësnionô anonimòwòsc.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie