Reklama

Protest w sprawie nadaniô pòzwë dlô mòstu w Stôrëch Pòlaszkach

Klëka

29/09/2025 11:21

Mòst w Stôrćh Pòlaszkach. Òdj. facebookòwô starna gminë Stôrô Cziszewa

Wedle niejednëch mieszkańców wëbrónô przez radzëznã pòzwa niesłëszno pòdsztrichiwô niemiecczé wątczi.

W piątk dwadzestégò szóstégò séwnika w Stôrëch Pòlaszkach wpół szósti wieczór miała bëc ùroczëzna nadaniô pòzwë nowémù mòstowi òddónémù do ùżiwkù latos w czerwińcu. W ùroczëznie miałë wzyc ùdzél wëszëznë gminë Stôrô Cziszewa a téż delegacjô z partnérsczi gminë Lahntal z Hesje w Niemcach. Przewelowónô przez radzëznã gminë pòzwa to: „Mòst Partnérstwa Gminów” – za ùchwôlënkã w ti sprawie bëło sztërnôsce radnëch, a jeden sã strzimôł òd głosu. Mieszkańcóm równak pòzwa sã nie ùwidzała, a za argùmentë pòdôwelë to, że wójt Andrzéj Hinc nie przeprowadzył niżódnëch kònsultacjów ze spòlëzną wsë, a téż że pasowniészô bëłabë pòzwa ùpamiãtniwającô jaczégòs Pòlôcha, bò niemiecczich wątków ju za wiele w pùblicznym rëmie. Procëmnicë delë sã na zòrganizowanié protestu kòl mòstu, ten miôł sã zaczic w piątk wpół piąti, gdze lëdze chcelë żdac na przedstôwców partnérsczich gminów. Ti równak na mòst nie przëszlë. Pòjawiło sã wiadło, że ùroczëzna miała bëc przeniosłô na pòstãpny dzéń, a delegacjô z Niemców je z wëszëznama gminë Stôrô Cziszewa na wieczerzë w jedny z restaùracjów. Part protestëjącëch pòszedł do restaùracje i jął przeszkadzac w zetkanim. Wezwónô òstała pòlicjô, jakô protestëjącëch roznëkała.

H.S.Sz.

Załączniki