To wierã nôlepszô mapa państwa Grifitów z XVII w. Dozdrzimë na ni zôpadné Kaszëbë, chtërne w nym czasu sygałë wiele dali w stronã Szczecënã jak dzysô. W Słëpskù pòkôzelë jã na pëszny kartograficzny wëstawie, jaką wcyg można tam òbzerac.
20 lëstopadnika równo ò 12 gòdzënie w pôłnié w Zómkù Pòmòrsczich Ksążãtów w Słëpskù Mùzeùm Westrzédnégò Pòmòrzô òtemkło wëstôwk z wnet setką dôwnëch mapów a planów. Wszëtczé pòkazëją Pòmòrzé, nôbarżi Zôpadné, nôstarszé z XVI w. W pierszi zalë, na westrzódkù mùzealnicë wëstawilë wierã nôpëszniészi ekspònat Nova illustrissimi Principatus Pomeranae des scriptio cum adjuncta Pirncipum Genealogia et Principum veris et potiorum Urbium imaginibus et Nobilium Infignibus, a krocy Wiôlgą Mapã Pòmòrzô Eilharda Lubinusa. To òriginał, kò nie je wiedzec, z jaczégò wëdaniô – pierszégò (1618 r.) czë drëdżégò (1758 r.). Do jednégò a drëdżégò drëkarze ùżëlë nëch samëch kòprożłóbnëch platów, jaczé – nie je wiedzec jak – wëbëłë wnet półtora wiekù midzë òbëdwùma wëdaniama.
– Nie jesmë w sztãdze domerkac datë pòwstaniô, bò nasza mapa òsta naklepionô na płótno. Temù nie jidze òdczëtac wòdnégò merkù òd papioru, na jaczim òsta wëdrëkòwónô. Czejbë to sã dało, mëszlã że më bë mòglë pòznac tã datã – dolmaczi Robert Kùpsynsczi, chtëren z Dorotą Hanowską przërëchtowôł wëstôwk.
Chto je lubòtnikã pòmòrsczi kartografie miôłbë zazdrzec do Słëpska. Prôwdac karta Lubinusa je do òbezdrzeniô w internece abò w wiele kòpiach, kò wierzta, że to nie je to samò, co wzéranié na òriginał.
P.D.
Twoje zdanie jest ważne jednak nie może ranić innych osób lub grup.
Komentarze opinie