Chòrosc Wislanégò Zalewù przed wòjną zdôrzała sã i na Kaszëbach. Terô przestrzégają przed nią wëszëznë wòjewództwa.
Pòmòrsczi Wòjewódzczi Ùrząd wëdôł rekòmendacje, wedle jaczich do kùńca maja je mùsz ògrańczëc jedzenié rib z Wislanégò Zalewù, òsoblëwie wãgòrzów i bańtków. Decyzjô òstała pòdjimniãtô pò tim, jak òd dzewiątégò maja òsmë sztëk lëdzy trafiło do bòlëców z òbjawama rzôdczi chòroscë, zwóny Chòroscą Wislanégò Zaléwù. Òdkrëtô òstała dzewiãcdzesąt dzewiãc lat nazôd w òkòlim Króléwca, a przez piãtnôsce lat pòtemù òdnotérowóné bëło kòl tësąc przëtrôfków ti chòroscë ù lëdzy, ptôchów i kòtów, nié blós wkòl Wislanégò Zalewù ale téż corôzka dali, w tim na Kaszëbach, le wiedno pò zjedzenim wikszi wielënë rib. Pòtemù zdôrzałë sã le pòjedińczné przëtrôfczi w Niemczech i Sowiecczim Związkù, a téż w Chinach, Brazylie i Zjednónëch Stanach. Chòrosc nie je zakaznô ani smiertnô, ale rzeszi sã z bólama mùsklów, bruną farwą szczënów, òstrą drzistówką, krótczim dichã, mòcnym mòkrzenim sã i wrazlëwòtą na wid. Nie je wiedzec, jakô toksyna jã sprôwiô. Przebùdzenié chòroscë badérëją znajarze ze Gduńska i Pùławów. Zachòrzałi to rëbôcë znad Wislanégò Zalewù i jich znajomi i to rib stamtądka jak na terô tikô sã òstrzéga. Direktór Wëdzélu Bezpiekù Wòjewódzczégò Ùrzãdu Riszard Sulãta prosy, żebë słëchac kòmùnikatów sanepidu dlô pòmòrsczégò a téż warmińskò-mazursczégò wòjewództwa.
Twoje zdanie jest ważne jednak nie może ranić innych osób lub grup.
Komentarze opinie