Reklama

Przeszukania bez nôkazu w cëgańsczich dzélnicach w Słoweńsce

Klëka

20/11/2025 12:30

Romsczé sedlëszcze (2008 r.). Aùtór: Margoz; zdrzódło: https://pl.wikipedia.org/wiki/Romowie#/media/Plik:Gypsy_settlement_near_Letanovce.jpg

Wiceprzédnik Romsczi Fùndacje dlô Eùropë Mensur Haliti wëstąpił przed Eùropejską Kòmisją, sprocëmniwającë sã nowémù prawù ùchwôlonémù w Ljubljanie.

Romsczi dzejarze wezwelë Eùropejską Kòmisjã do tegò, żebë sprocëmniła sã nowémù prawù przëjimniãtémù przez słoweńsczi rząd. Dôwô òn szandaróm prawò do przeszëkiwaniô mieszkaniów bez sądowégò nôkazu i aktiwnégò dozéraniô dzélniców, jaczé służbë ùznają za te ò pòdwëższonym rizykù. Romòwie mają lãk, że wëzwëskóné to bãdze w przédny rédze do inwigilacje romsczich dzélniców. Ùstôw béł zabédowóny pò smiercë sztërdzescëòsmëlatnégò Aleša Šutarja pòd kùńc rujana, zabitégò nożã pòd nocnym klubã przez dwadzescejedenlatnégò Roma w gardze Novo Mesto. Pò danim wiadë ò pòchòdzenim sprôwcë, w gardze zaczãłë sã protestë procëm Romóm. Wprowadzonô zjinaka je znónô jakno „ùstôw Šutarja” i miała bëc direktną òdpòwiescą na zbòjania spòlëznë tikającé sã rozwiju przesprawiô westrzód Cëganów. Premiéra Słoweńsczi Robert Gòlob gôdô, że nie jidze ò diskriminacjã, le ò zagwësnienié bezpiekù òbëwatelóm, co bë ni miało bëc téż parłãczoné z ambicjama niżódny pòliticzny òpcje. Pòdczorchnął téż, że bez eliminacje zagrôżbë z romsczich òbsadłowiów nimòżebnô bãdze ùdałô integracjô ny mniészëznë ze spòlëzną. Rzeczniczka Eùropejsczi Kòmisje Eva Hrnčířová we wtórk òsmënôstégò smùtana wezwała rząd w Ljubljanie do zagwësnieniô, że zjinaka nie bãdze wëmierzonô w niżódną mniészëznã, a prawa człowieka nie bãdą w kraju łómóné. Ùstôw Šutarja jesz mùszi bëc pòdpisóny przez prezydenta.

H.S.Sz.