Dérëje szëkba za Vance'ã Boelterã, winowónym ò atak na dwùch pòlitików demòkraticzny partie i jich rodzëznë w Minneapòlis.
W sobòtã sztërnôstégò czerwińca wczas reno w Minneapòlis, nôwikszim gardze amerikańsczégò stanu Minnesota, pòd chëcz stanowégò senatora Johna Hoffmana pòdjachôł aùtół szlachòwny za pòlicjowim. Wësôdł z niegò chłop w szandarsczim mùńdurze, jaczi zaklepôł do dwiérzi senatora i prosył ò wpùszczenié bënë. Czej ten to zrobił, za sztót òn i jegò białka òstelë czile razy pòstrzelony przez falszewégò szandarã. Z cãżczima renama trafilë pózdni do bòlëcë, a lékarzë są dbë, że wëzdrowieją. Służbë zawiadomioné ò atakù za półtora gòdzënë bëlë pòd chëczą przedstôwcczi stanu Melissë Hortman, chcącë ùgwësnic sã ò ji bezpiekù. Tam akùrôt trafilë na chłopa przezeblokłégò za szandarã i zaczãlë strzelac w jegò czerënkù, ale ùdało mù sã zwiornąc. Czej weszlë dodóm, Melissa Hortman i ji chłop leżelë zabiti. Przeszukelë òstawiony przez sprôwcã aùtół i nalezlë w nim pòliticzny manifest i lëstã célów atakòwnika. Wszëtcë bëlë nôleżnikama demòkraticzny partie. Rëgnãła szëkba za atakòwnikã, rozpòznónym jakno piãcdzesąt sétmë lat stôri Vance Boelter. Wëstawilë za nim scëgòwny lëst. Za infòrmacje ò tim, gdze mòże sã krëc, je wëznaczonô nôdgroda piãcdzesąt tësący dolarôw. Stanowô pòlicjô kôzała lëdzóm nie òdmëkac dwiérzi òd chëczi nikòmù w szandarsczim mùńdurze, chëba że bëłobë jich dwùch.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie