Reklama

Pùtin przëznôł sã do strąceniô cywilnégò fligra

Klëka

10/10/2025 11:45

Fliger, jaczi òstôł zestrzélony przez Rusków; Mehmet Mustafa Celik - https://www.airliners.net/photo/Azerbaijan-Airlines-AZAL-AHY/Embraer-190AR-ERJ-190-100IGW/3886171/L

Na pòtkanim z prezydentã Azerbejdżanu rusczi wódca scwierdzył, że łoni w gòdnikù azersczi fliger spôdł pò atakù rusczich patrónów, le òne nie trafiłë w samã maszinã.

We czwiôrtk dzewiątégò rujana w Duszanbe w Tadżikistanie doszło do zetkaniô prezydenta Rusczi Władimira Pùtina z prezydentã Azerbejdżanu Ilhamã Ëlijewã. Dwaji wódcë gôdelë ò katastrofie azersczégò fligra z gòdnika łońsczégò rokù. Azerbejdżan winowôł Rusjã, że òb czas lądowaniô kòl Groznégò w Czeczenie fliger òstôł strącony przez rusczé patrónë, co doprowadzëło do smiercë trzëdzescë òsmë lëdzy na szescdzesąt sétmë na pòkładze. W wikszoscë bëlë to òbëwatele Azerbejdżanu. Zarô pò zdarzenim Pùtin zwònił do Ëlijewã z kòndolencjama, ale òdmôwiôł przëznaniô òdpòwiedzalnotë Rusczi za sczidniãcé maszinë. Przez to dérowôł midzë państwama diplomaticzny sztrid. Na tim pierszim zetkanim midzë wódcama òd rokù Pùtin wëwidnił, że rusczé patrónë bëłë wëmierzoné w ùkrajińsczé dronë, chtërne atakòwałë gard òb czas zdarzeniô. Wedle niegò nie grzimnãłë ani w dronë, ani we fliger, le eksplodowałë w lëfce krótkò azersczi maszinë, jaką trafiłë òdłómczi patrónów. Zapòwiedzôł, że wëznaczonô kòmisjô zrobi wszëtkò, żebë do kùńca wëwidnic, co sã stało. Rozwôżoné mô bëc téż przëznanié szkòdowaniów.

H.S.Sz.

Załączniki