Zwënédżi karna Sławòmira Bronka achtnãłë wëszëznë gminë Serakòjce. Wójt pòwinszowôł nôleżnikóm dobëcégò.
We wtórk 10. gòdnika samòrządzëna gminë Serakòjce pòwinszowała nôleżnikóm chùru Discantus z Gòwidlëna dobëcégò pierszégò placu w Midzënôrodnym Kònkùrsu Kòlãdów w Nowim Jorkù. Wójt gminë Serakòjce Mirosłôw Kùczkòwsczi przekôzôł apartny lëst, w jaczim pòdsztrichnął znaczenié jich dobëcégò dlô gminë i regionu. W miono chùru gratulacje òdebrôł jegò dirigent Sławòmir Bronk.
Chùr Discantus wëstãpiwôł na nowòjorsczim kònkùrsu kòlãdów jakno jedurny reprezentant Pòlsczi. Òb czas swòjégò wëjazdu do Americzi gòwidlëńsczi chùr dobéł w piątk 22. smùtana na kònkùrsu I plac w swòji kategórie i dôł czile kòncertów w môlowëch kòscołach. Discantus zaprezentowôł sã w Nowim Jorkù w pòlskò-kaszëbsczim repertuarze.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie