Donald Trump òdcął wspiarcé dlô mediów dzejającëch òd wnetka òsmë dekadów. Czesczi minister chce pòcygnąc jich misjã dali.
Decyzją prezydenta Zjednónëch Stanów Donalda Trumpa w sobòtã piãtnôstégò strëmiannika strzimóné òstałë transmisje bùtnowëch mediów amerikańsczégò rządu: Głosu Americzi, Radia Wòlnô Eùropa i Radia Wòlnô Azjô. Wszëtcë gazétnicë robiący w Głosu Americzi dostelë wiadła ò wësłanim na przëmùsowi ùrlop do òdwòłaniô, a Radio Wòlnô Eùropa i Radio Wòlnô Azjô mają strzimóné financowanié. Radia te nadôwałë ju sétmëdzesąt piãc lat i miałë zagwësniwac dotëgòwiwanié głosu amerikańsczi demòkracje do aùtoritarnëch krajów. Biôłi Dodóm tłómaczi decyzjã prezydenta niezgòdą na to, żebë amerikańsczi pòdatnicë płacëlë za media radikalny lewiznowi propagandë. Minister Bùtnowëch Sprôw Czesczi Repùbliczi Jan Lipavský dôł do wiadë, że bãdze chcôł òbgadac dalszé fùnksnérowanié Radia Wòlnô Eùropa na zéńdzeniu szefów diplomacje eùropejsczich państwów, chtërno zaczinô sã w pòniedzôłk sétmënôstégò strëmiannika. Dzysdniowô sedzba radia je w Pradze. Czechòwie mają je za wôżny part swòji historie i są dbë, że jegò aùdicje mùszą dali wëchadac, chòcbë i bez dëtków z Americzi.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie