W interpelacji do miesczich wëszëznów Jakùb Swidersczi pitô sã ò spòdlé dzysdniowi pòliticzi biôtczi z dzëkama a téż skłôdô bédënk wëzwëskaniô jich miãsa.
Radny Sopòtu Jakùb Swidersczi złożił interpelacjã do prezydentczi gardu Magdalénë Czarzińsczi-Jôchim. Domôgô sã wëwidnieniów w sprawie dzysdniowi pòliticzi gardu co do pòdchôdaniô do jiwru z dzëkama w sopòcczich lasach, tej-sej przëchôdającëch i do miasta. Dzysdnia gard wëdôwô pòzwòlenia na jich òdsztrzał. Radny przëbacziwô w interpelacje pòlitikã ùszłégò prezydenta Jacka Karnowsczégò, jaczi béł za rim, żebë dzëczi chwatac i wëwòzëc bùten grańców gardu. To równak wedle dzysdniowëch wëszëznów sã nie sprôwdzało, bò dzëczi prosto so do Sopòtu wrôcałë. Swidersczi pitô sã prezydentczi ò prawné spòdlé dlô zgòdë na òdsztrzôł, òbróné métle zjiscywaniô tegò zadaniô i planë na przińdnotã. Nôwikszé bôczenié zwrôcô równak pitanié ò to, czë gard mô ùdbóné brac miãso z zabitëch dzëków i pò przebadérowanim òddawac sopòcczim jôdnicóm w szkòłach abò tim prowadzonym przez Caritas i jinszé placë pòmòcë. Miało bë to dzejac procëm tranowieniémù jôdë. Prezydentka Czarzińskô-Jôchim ùznała tã ùdbã za czësto bùten szëkù, a rzekła, że szło bë to ùznac za niesmiészny szpòrt, czejbë nie nalazło sã w òficjalny interpelacje. Przëbacziwô, że dzejania Sopòtu dlô likwidacje dzëków są sparłãczoné z biôtką z Afrikańsczim Pòszëdłã Swiniów, jaczé przenôszają dzëczi.
H.S.Sz.
Twoje zdanie jest ważne jednak nie może ranić innych osób lub grup.
Ten komentarz jest ukryty - kliknij żeby przeczytać.