Reklama

Rëbôk strzimôł wòjska NATO

Klëka

26/10/2025 19:12

https://www.nato.int/cps/en/natohq/news_238367.htm

Zmerkóny przez dozérôczów cwiczeniów rëbôk wëstawił niemiecczé wòjskò na grozbã wiôldżich stratów. Protest Òlafura Einarssona pòpiérają môlowé maszoperie.

We strzodã dwadzestégò drëdżégò rujana w nordowi Norwesce prowadzoné bëłë manewrë Nordowòatlaticczi Zdrëszënë pòd pòzwą Steadfast Noon. Wkół òstrowù Andøya wòdë òstałë zamkłé, a bezpiekù pilowało norwesczé kòsmiczné centrum ùsadzoné na òstrowie. Niemiecczi pilocë mielë przelecec nad wòdą i spùscëc z wòjskòwëch fligrów bómbë w wëmerkóné place. Tedë równak służbë dozérającé wòdë ùzdrzałë w niebezpieczny conie rëbacczi kùter i rëbôka, jaczi rozstawił jadra. Pilocë dostelë rozkôz przerwaniô cwiczeniów i pòwrotu do bazë. Kòsmiczné centrum Andøya Space pòdało, że nieprzewidzóné narëszenié zakôzóny òbéńdë przez chłopa mògło niemiecczi latawiznie sprawic wielemiliónowé stratë. Rëbôk nie òstôł anonimòwi, bò dwa dni pózdni, w piątk dwadzestégò czwiôrtégò rujana, òpòwiedzôł ò zdarzenim w lokalny gazéce. Òlafur Einarsson rzekł, że béł fùlno swiądny, że wjachôł bôtã do niebezpieczny conë. Òn chcôł tak dac dokôz swòjégò gòrzu na to, że norwesczé wòjskò wiedno czãscy wëdôwô zakazë łowieniô rib na wòdach archipelagù Vesterålen i zmieniwô wczasni przëjimniãté ùgôdënczi. Scwierdzył, że rëbôcë mają terô jawerny sztrid ò teritorium z wòjskã, chtërno ùcãżiwô jim robòtã. Zapòwiedzôł, że je fardich zôs przeszkadzac w cwiczeniach.

H.S.Sz.