Reklama

Rëchawa w sôdzë w Sri Lance

Klëka

08/07/2026 19:56

Sztrôfné zôkładë w Sri Lance są kòl sztërë razë przefùlowóné. Rëchawë wëbùchają czãsto, ale rzôdkò zbiérają jaż tëli òfiarów.

W sôdzë w gardze Negòmbò na zôpadnym Cejlonie doszło do òstri rëchawë, przez jaką zdżinãło dwadzesce szesc lëdzy, w tim sétmë starżników, a przeszło sto bëło renionëch. Zaczic sã miało òd biôtków midzë dwùma grëpama sôdzewëch pò tim, jak jeden z nich doniósł administracje ò handlu narkòtikama w mùrach sôdzë. W niedzelã piątégò lëpińca ùczãstnicë biôtków zaatakòwelë starżników, żebë zabrac jim barniã i ùżëc ji procëm wrodżi grëpie. Dwie òsobë tedë zdżinãłë, a pózdni sôdzewi zaczãlë wlażac na daczi bùdinków i domagac sã wëpùszczeniô. W pòniedzôłk szóstégò lëpińca ùsadzony atakòwelë brómë sôdzë, a administracjô pòdjimnãła decyzjã ò ùżëcym strzélnym barnie procëm bùrzonóm – je wiedzec, że tedë strzałë padłë i òd rzmë w czerënkù starżników. Renionëch w biôtkach przewiezlë do bòlëców w Negòmbò i Kòlombò. Je téż wiedzec, że òb czas zdarzeniów zarwôł sã dak w białczim dzélu sôdzë. Dérëje wëwòżenié sôdzewëch do jinszich prizów przez grozbã dalszich bùdowlanëch katastrofów. Rodzëznë skôzónëch zaczãłë sã zjeżdżac pòd zôkłôd, ale administracjô jim nie przekôzała, chto ùmarł, chto je reniony, ani gdze są jich krewny.

H.S.Sz.

Źródło i opracowanie własne