Òstałi w rządze Socjaldemòkracë i Zelony ni mają ju wikszoscë w parlamence, jakô bë pòzwòlëła jima dobëc w nadchôdającym welowanim nad votum zawierzeniô.
Na zéńdzenim niemiecczi rządzący kòalicje w strzodã 6. smùtana wieczór pòliticë diskùtowelë nad federalnym bùdżetã na 2025 rok – sprawie, jakô ju òd tidzeniów bùdzëła sztridë midzë partiama twòrzącyma kòalicjã, to je Socjaldemòkraticzny Partie Niemców, partie Zelonëch i Wòlny Demòkraticzny Partie. Przédnik ti òstatny, Christian Lindner, jaczi w rządze kanclerza Olafa Scholza béł ministrã financów, òstôł pòdóny do dimisje przez kanclerza. Nôleżący do Wòlnëch Demòkratów minister sprawiedlëwòscë Marco Buschmann i ministra edukacje Bettina Stark-Watzinger téż ògłoszëlë że wińdą z rządu, za to minister transpòrtu Volker Wissing zdecydowôł że òstawi swòjã partiã i òstónie w rządze na ternym stanowiszczu. To òznôczô rozpôd rządzący kòalicje, a dlô Socjaldemòkratów i Zelonëch mùszebnosc przedërchaniô w mniészëznowim rządze.
Kanclérz Scholz zapòwiedzôł welowanié nad votum zawierzeniô dlô rządu w Bundestagù do 15 stëcznika 2025, a to pò òdéńscym Wòlnëch Demòkratów bãdze wierã przegróné. Przez to je mòżlewô pòd kùńc strëmiannika chùtszô welacjô do Bundestagu, żelë prezydent Frank-Walter Steinmeier dô sã na rozrzeszenié jegò ternégò składu.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie