Dwa państwa spiérałë sã ò niezamieszkałé òstrowë, kòl jaczich nalezlë złoża petrólczi.
Midzënôrodny Tribùnał Sprawiedlëwòscë rozrzesził sztrid midzë Równikòwą Gwineją a Gabònã ò òstrowë Conga, Mbanié i Cocoteros na Gwinejsczi Hôwindze. Zaczął sã w sétmëdzesątëch latach ùszłégò stalatégò, czedë Gabón wënëkôł gwinejsczé wòjskò z Mbanié, nôwikszégò z òstrowów, a ùsadzył tam gwôsną wòjskòwą bazã. Òdżił na zôczątkù tegò wiekù, czej òkôzało sã, że kòl tëch niezamieszkałëch òstrowów pòd wòdą są złoża petrólczi. Wedle rozsądzënkù Midzënôrodnégò Tribùnału Sprawiedlëwòscë, na mòcë ùgôdënkù z tësąc dzewiãcsetnégò rokù ò pòdzél kòloniów midzë Francjã a Szpańskã dzysdnia òstrowë słëchają Równikòwi Gwineje, chtërna zwëskała samòstójnotã òd Szpańsczi w tësąc dzewiãcset szescdzesątim ósmim rokù. Bez mòcë òstôwô traktat z Bata zawiarti w tësąc dzewiãcset sétmëdzesątim czwiôrtim – dwa lata pò zajimniãcym Mbanié przez Gabón – jaczi włôdzã nad òstrowama miôł przëznawac Gabònowi. Òriginał tegò dokùmentu sã nie ùchòwôł i gabòńskô starna mògła sã pòwòłëwac blós na fòtokòpie. Terô pò rozrzeszenim sztridu Gabòńczcicë bãdą mùszelë wëcopac sã ze swòji bazë na Mbanié, a na jich plac nazôd przińdą żôłnérze Równikòwi Gwineji.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie