Reklama

Rozséłôł trëtkã chcącym sã zabic

Klëka

01/06/2026 08:59

Òbskôrżony przedôwôł substancjã do sztërdzescë krajów na całim swiece. W sami Kanadze i Wiôldżi Britanie mógł doprowadzëc do smiercë nômni dwasta lëdzy.

W sądze w Òntario prowadzą proces szescdzesątlatnégò Kennetha Lawa, parłãczonégò ze smiercą przez dwasta lëdzy w Kanadze i Wiôldżi Britanie. Chłop béł aresztowóny trzë lata nazôd. Miôł przez dłëgszi czas kòntaktowac sã z lëdzama z psychicznyma jiwrama przez Internet i przedawac jima trëjącą chemiczną substancjã. Na ten ôrt rozesłôł co nômni tësąc dwasta paczétów do przez sztërdzescë krajów. W Kanadze i we Wiôldżi Britanie pòlicjô zakłôdô, że w tëch krajach nawet dwasta lëdzy mògło ùmrzéc pò przëjimniãcym substancje kùpiony òd Kanadijczika. Britijsczi pòdszukòwny ùznelë, że stara ò ekstradicjã Kanadijczika bëłabë bùten szëkù, czej i tak bãdą gò sądzëlë w jegò kraju. Kómpetencje w sprawie sétmëdzesąt dzewiąc ùmarłëch Britijczików przekôzelë tedë kanadijsczémù sądowi. Òficjalné òbwinë, jaczé Law ùczuł do terô, tikałë sã pòcwierdzony smiercë sztërnôsce lëdzy, òd szesnôsce do trzëdzescë szesc lat stôrëch. Dogôdóny z prokùraturą przëznôł sã do pòmôganiô w jich sãzabicym, a tedë prokùratura wëcopała òbwinë mòrdarstwa. W kanadijsczim prawie za pierszą przesprawã grozy do sztërnôsce lat sôdzë, a za drëgą dosmiertnô sôdza z mòżebnoscą starë ò zwòlnienié pò dwadzesce piãc latach. Pòdszukòwny dali równak robią nad zaòstałima przëtrôfkama. Kenneth Law wërok mô ùczëc w séwnikù.

H.S.Sz.

Źródło i opracowanie własne