Reklama

Réskòwné òperacje i nisczi sztandard

Klëka

31/01/2026 10:51

Òdj. https://www.bbc.co.uk/programmes/l0057xb7

Dzecnô bòlëca ùznôwónô za jedną z nôlepszich na swiece przez piãc lat trzimała ù se chirurga winnégò wnet sto zaszkòdów ù pacjentów.

Londińskô bòlëca Great Ormond Street Hospital òpùblikòwała raport ò felach jednégò ze swòjich dôwnëch lékarzów. Chirurg Yaser Jabbar robił w bòlëcë òd dwa tësące sétmënôstégò do dwa tësące dwadzestégò drëdżégò rokù. Zajimôł sã midzë jinszima wëdłużiwanim rãk i nóg ù dzecy ze złożonyma jiwrama. Przeprowadzył sétmëset òsmëdzesąt dzewiãc òperacjów na dzecach, wszczépiającë jim metalowé płëtczi, implantë i gnôtowé przeszczépë. Dzewiãcdzesąt sztërzech pacjentów pò òperacjach cerpiało przez fele zrobioné przez chirurga. Same òperacje wiedno słëchałë do tëch wësoczégò rizyka. Wedle rapòrtu nie dô sã òbtaksowac, kùli z pózdniészich lëchëch skùtków dało sã ùniknąc, ale dokùmentacjô wskazéwô, że chirurg trzimôł nisczé sztandardë. Ze szkòdama wiele dzecy bãdze żëło do kùńca żëcégò. W gromicznikù całą dokùmentacjã przezdrzi jesz anielskô Nôrodnô Służbã Zdrowiégò. Sóm Yaser Jabbar dostôł zôkôz robieniô za lékarza, ale przed kùńcã wëdowiédzë procëm niemù wëjachôł z Wiôldżi Britanie. Nie je wiedzec, gdze terô mieszkô.

Źródło i opracowanie własne