Złodzeje dostelë w swòje rãce m.jin. kilogramòwi szłom z czëstégò złota, ùlóny 2500 lat dowsladë.
W sobòtã 25. stëcznika przed gòdzëną 4. reno w niderlandzczim Assen doszło do napadniãcô na mùzeùm Drents. Czile przesprôwców ùżëło wëbùchowëch ladënków, żebë dostac sã do westrzódka. Jich célã béł wëstôwk „Dacjô, imperium złota i strzébra” gdze wëstawioné bëłë wëpòżëczoné z Rumùnie skarbë: trzë złoté spiralné bransoletë, a téż tpzw. „szłom z Coțofenești”, zrobiony kòl 2500 lat dowsladë z kilograma czëstégò złota. Chòc mieszkańcë ùczëlë wëbùch i zazwònilë pò szandarów, nie ùdało sã jima złapac złodzejów. Felëje téż wskôzów do dalszi wëdowiédzë – wstãpno zbadérowóny mô bëc leno jeden aùtół, chtëren ti nocë spôlił sã niedalek mùzeùm. Harry Tupan, direktór mùzeùm Drents, mówił ò czôrnym dniu nié leno dlô môlu, skądka skarbë òstałé ùkradłé, ale téż dlô Nôrodnégò Mùzeùm w Bùkareszce, skądka òstałë wëpòżeczoné do Holandie na brëkòwnotë wëstôwkù. Môlowô pòlicjô sprôwdzô nagrania mònitoringu i prosy ò jaczélebądz infòrmacje, chtërne mògą sã przëdac w sprawie kradzeżë.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie