Reklama

Ruscë rëchtëją bazë przë grańcë z Fińską

Klëka

03/02/2026 19:43

Ze swiata, Ruscë rëchtëją bazë przë grańcë Fińską - zdjęcie, fotografia

Nowé òbiektë mają bëc òbsadzoné żôłnérzama, jaczi dzysdnia w wikszoscë biôtkùją na Ùkrajinie.

Fińsczi pùbliczny nadôwca òpùblikòwôł satelitarné òdjimczi zrobioné w łońsczim i załońsczim rokù pò rusczi starnie fińskò-rusczi grańcë. Z doparłãczony do pùblikacje analizë wëchôdô, że Ruscë zbroją przëgrańczną òbéńdã. Wiôldżi pòkrok béł zrobiony w rozbùdowie wòjskòwi bazë Ribka w Pietrozawòdskù w Repùblice Karelie, sto sétmëdzesąt piãc kilométrów òd grańcë. Garnizón nie béł brëkòwóny òd kùńca dzewiãcdzesątëch lat, le terô mô bëc wëzwëskóny przez Sztërdzesti Czwiôrti Armijny Kòrpùs słëchający Leningradzczémù Wòjskòwémù Òkrãgòwi. Nową bazã stôwiają w Kandałakszë w mùrmańsczim òbwòdze, sto piãtnôsce kilométrów òd grańcë. Tã òbstawic mają nowé brigadë artilerijnô i inżiniérijnô. Kòmentarorzë wskazéwają, że rozbùdowa i stôwianié nowëch bazów szlachùją za dzejaniama Rusczi kòl Ùkrajińsczi grańcë przed fùlskalowim najachùnkã sztërë lata nazôd. Szlachòwnô je téż narracjô Kremla wedle Fińsczi, gdze przez nawleczenia do historie w wątplëwòsc je pòddôwónô fińskô suwerennosc i dzysdniowé grańcë, a przëbacziwóné epizodë kòlabòracje z Trzecą Rzeszą. Fińskô òd łżëkwiata dwa tësące dwadzestégò trzecégò rokù je nôleżnikã Nordowòatlanticczi Zdrëszënë, co znaczi że ewentualny najachùnk na niã w przińdnoce òznôczôłbë wëpòwiedzenié przez Ruskã wòjnë NATO.

Źródło i opracowanie własne