Reklama

Rusczé prowòkacje krótkò pòlsczich wód

Klëka

20/07/2026 00:15

Òdj. Radomil talk; zdrzódło: https://pl.wikipedia.org/wiki/Si%C5%82y_Powietrzne#/media/Plik:Krzesiny_8RB.JPG

Nie przekôzelë planu lecbë i wëłączëlë ùrządzenia lokalizacje. W jich òdprowadzenim pòmòglë Szwédzë.

W tim tidzeniu rusczi pilocë są òsoblëwie aktiw nad Bôłtã. Pòlsczé wëszëznë ju trzecy rôz dałë do wiadë ò przechwôcenim jich fligrów. We wtórk sztërnôstégò lëpińca Òperacjowé Wództwò Ôrtów Zbrojnëch Sëłów dało do wiadë, że pôra jachtarsczich fligrów przechwôcëła rusczi rozeznôwny fliger trzëdzescë kilométrów òd Ùstczi. We strzodã piãtnôstégò lëpińca minister nôrodny òbarnë Władisłôw Kòsyniôk-Kamisz przekôzôł, że dwa jachtarsczé fligrë z Malbòrga przejãłë nad Bôłtã dwa rusczé biôtkarsczé fligrë z kaliningardzczégò òbwòdu i przekôzałë je pôrze fligrów ze Szwédzczi, chtërne dali je eskòrtowałë. We czwiôrtk szestnôstégò lëpińca zôs pôra z Malbòrga przechwôcëła dwa rusczé fligrë, a pòtemù mùsza lecec do jesz jednégò, trzëdzescë kilométrów òd Pilëców. Tegò téż òddelë Szwédóm. Do wszëtczich tëch zdarzeniów doszło nad midzënôrodnyma wòdama. Ruscë mają prawò nad nima latac, ale we wszëtczich tëch przëtrôfkach òni nie zgłosëlë planu lecbë i wëłączelë transpòrderë, to je ùrządzenia wskazéwającé jich bëtnosc na niebie jinym latawnym jednostkóm. To sprôwiô zagrôżbã. Òkróm tegò tur lecbë Rusków wskazéwôł na to, że chcelë òni sã przëzdrzec pòlsczim systémóm procëmlatawny òbarnë.

H.S.Sz.

Źródło i opracowanie własne