Reklama

Ùsadzą Nôrodny Panteón Ùkrajinë

Klëka

01/07/2026 19:36

Do ùkrajińsczégò parlamentu trafił projekt wskôzów co do ùsadzeniô placu pamiãcë dlô ùkrajińsczich nôrodnëch herojów.

W niedzelã dwadzestégò ósmégò czerwińca w Kijiwie prezydent Ùkrajińsczi przemôwiôł w Dzéń Kònstitucje Ùkrajinë. Dôł do wiadë ò sczerowanim do Nôwëższi Radzëznë projektu ùstawù ò bùdacje Nôrodnégò Panteònu Ùkrajinë. Miałobë to bëc centrum pamiãcë namienioné lëdzóm zasłużonym dlô biôtczi ò wòlnotã Ùkrajinë, ji rozwij, sztôłtowanié nôrodu, armie, kùlturë, kùńsztu, nôùczi, spòrtu, jãzëka, òbëwatelsczi spòlëznë i religie. W projekce bãdze ùsadzoné szesc kategòriów taczich òsób. Bùdink mô przëwdarzëc tëch herojów a sztôłtowac ùkrajińską nôrodną juwernotã. „Nicht nigdë nie bãdze nama nakazëwac, jak żëc, jak gadac, kògò kòchac, kòmù bëc wdzãcznym i jaczich herojów tcëc” – gôdôł Zełeńsczi, czej ògłôszôł ùdbã. Jeden z inicjatorów projektu Mikita Pòturajew pòdczorchiwô, że jesz ni ma fardich lëstë dzejarzów do ùczestnieniô. Ùstôw ùsadzył za to kriteria dobiéru òsób do kòmisje, jakô miałabë zrëchtowac taką lëstã. Jedną z nôbarżi kòntrowersjowëch pòstacjów miôłbë bëc Stepan Bandera, wódca Òrganizacje Ùkrajińsczich Nôrodników. Pòturajew gôdôł, że jegò nôzwëskò jak nôbarżi mòże sã nalezc na lësce, kò Bandera mô wiele zdzejóné òb czas swòjégò żëcô dlô ùkrajińsczi samòstójnotë.

H.S.Sz.

Źródło i opracowanie własne