Reklama

Scërze szkòdzą rédzczi rodze

Klëka

23/05/2026 15:18

Jeden z groznëch kaszëbsczich miesczich psów. Òdj. IM

Ùszkòdë w bòbrowi damie i smierc dwùch sarnów to skùtczi pùszczaniô psów wòlno w sedlëszczach dzëwëch zwierzãt.

Radnô gardu Rédë Katarzëna Smòlskô nagłosniwô jiwer z psama, jaczé lëdze pùszczają lózã tam, gdze żëją dzëwé zwierzãta. Na spòlëznowëch mediach òpisała sytuacjã z terenu kòl szasëje Jawòrowi nad rzéką, gdze biwałë trzë sarnë, mëmkã z dwùma sarniãtama. Zaczãłë tam téż przëchadac wiôldżé psë bez smëczów, chtërne nëkałë za sarnama i nie reagòwałë na wòłanié miéwcôw. Jednégò dnia rodzëzna, jakô tam czãsto szpacérowała, nalazła w tim placu sarniãta zagrëzłé, a jich mëmkã biegającô wkòło i głosno bleczącą. Za czile dni Smòlskô pòkôzała nagranié z bòbrowi damë na terenie Rédë, mònitorowóny ë òznaczony przez Stowôrã Naji Bòber. W jednym parce nagraniô bëło widzec bòbra, jaczi w nocë dokłôdôł wietwiów do tamë i jã gacył. W drëdżim parce bëło widzec, jak na tã samã damã béł wlazłi wiôldżi pies, chtëren rozgrzebiwôł wietwie, pò czim przez damã wòda lała sã strużką. Wedle radny sama miéwcka psa wëcygała psu knëple z damë. Radnô, Stowôra Naji Bòber a téż jinszi strzodowiszczowi dzejarze przëbacziwają, że pùszczanié psów bez tidra w dzëwëch môlach mòże miec negatiwny cësk na rodã, a dlô miéwców mòże sã skùńczëc wësoką dëtkòwą sztrôfą.

H.S.Sz.

Źródło i opracowanie własne