50-latny Viktors Pučka ju przódë dostôwôł sztrôfë za niesygającą znajomòtã łotewszczëznë.
W czwiôrtk 31. rujana łotewsczi Sejm zadecydowôł na welowanim, że pòsélc eùroscepticzny partie „Dlô Sztabilnotë!” Viktors Pučka òstónie sczerowóny na egzamin z łotewsczégò jãzëka. Wedle òbòwiązywającégò prawa pòsélc mòże przestãpic do testu dwa razë òb nôblëższé piãc miesãcy, a żelë nie ùdô mù sã gò zarechòwac, sejm mòże òdebrac mù pòsélczi mandat. Je to pierszé ùżëcé taczi procedurë w historie kraju. Łotewsczi parlament òbgadiwôł téż mòżebnosc wësłaniô na egzamin kamrôta z partie Pùčczi, Jefimija Klementiewa, le kùreszce pòzwòlëlë mù na kòntinuòwanié swòji robòtë z pòzdrzatkù na widzałé pòdwigniãcé sã Klementiewa w jãzëkù w slédnëch miesącach. Kawel Pučczi je niegwësny, bò w ùszłim tidzeniu pòdchôdôł òn ju do państwòwégò testu, chtërnégò nie ùdało mù sã zdac.
Òbaji pòliticë w ùszłoce mielë na sebie nałożoné administracyjné sztrôfë za lëchą znajomòtã ùrzãdowégò jãzëka. Jich partiô, ùznôwónô za pòpùlisticzną, w swòjim programie mô biôtkã ò prawò do ùczbów w szkòle w rusczim jãzëkù, jaczégò w Łotwie brëkùje widzałô mniészëzna òbëwateli. Je to téż rodnô gôdka Pučczi i Klementiewa.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie