Setczi zabitëch w biôtkach w Rio de Janeiro

Célã szandarów ze stanu Rio de Janeiro béł grozny gang Czerwioné Kòmando. Akcjô bëła rëchtowónô òd rokù i nie wiedzôł ò ni federalny rząd.

We wtórk dwadzestégò ósmégò rujana w Rio de Janeiro w fawelach (biédnëch dzélach gardu) Alemão i Penha pòlicjô zrëchtowała wiôlgą akcjã procëm przesprôwcóm. Òsoblëwie mielë ùdbóné ùderzëc w Czerwioné Kòmando, jeden z nôgrozniészich narkòtikòwëch gangów w Brazylie. Swiôdkòwie òperacje gôdają, że szlachòwała òna za wòjnowima dzejaniama. Kòl dwa i pół tësąca szandarów wzãło ùdzél w akcje nié leno piechti, le téż w dwùch helikòpterach, trzëdzesce dwùch òpancerzonëch wòzach, i dwanôsce wòzach rénëjącëch do nikwieniô barikadów, jaczé pòzastôwielë przesprôwcë. Czerwioné Kòmando wëzwëskało midzë jinszima dronë, z jaczich spùszcziwelë wëbùchòwé ladënczi na szandarów. Pò akcje nad fawelama ùnôszôł sã dim i skrë z żôlącëch sã aùtołów. Gùbernatór stanu Rio de Janeiro Cláudio Castro dôł do wiadë, że pòlicje ùdało sã skònfiskòwac co nômni sztërdzescë dwie sztëczi strzélny barnie, a téż że bëła to nôwikszô òperacjô procëm zòrganizowónémù przesprawiémù w historie stanu. W biôtkach zdżinãłë sto trzëdzescë dwie òsobë, z czegò sztërzeji to bëlë szandarzë, a całô néga – wedle wëszëznów stanu – to sami nôleżnicë gangów. Jesz we strzodã na szasëjach fawelów leżało kòl sétmëdzesąt całów, jaczé mieszkańcë wënieslë bùten pò naloce, szukającë midzë nima swòjich krewnëch. Prezydent Brazylie Luiz Inácio da Silva przekôzôł, że béł zaskòkniony taką wielëną òfiarów, a téż że ò planowónym naloce nie béł pòinfòrmòwóny federalny rząd, czej wedle pòlicje przërëchtowania dérowałë wicy jak rok. Bióro Wësoczégò Kòmisarza Òrganizacje Zjednónëch Nôrodów do sprôw Prôw Człowieka wëdało kòmùnikat, w jaczim wërazëło ùrzas przez wiôlgòsc akcje, przëbôczëło ò mùszebnoce szónowaniô prôw człowieka i wezwało do rëgniãcô z wëdowiédzą, żebë sprawdzëc, czë òb czas biôtków nie òstałë òne złómóné.

H.S.Sz.