Reklama

Skardżi na gòdowi trolejbùs

Klëka

16/12/2025 11:25

Wedle procëmników trolejbùs sprôwiôł zagrôżbã i brzëdkò wëzdrzôł. Wëcopelë gò z rëchù i schòwelë lampczi do bëna.

Òd niedzelë sztërnôstégò gòdnika na szasëjach Gdinie ju ni ma widzec tak pòzwónégò gòdowégò trolejbùsu òbwieszonégò lampkama. Ùdba, żebë jeden taczi trolejbùs pùscëc, wëszła òd Pòdjimiznë Trolejbùsowi Kòmùnikacje, na mòdło taczé jak we wiele jinëch gardach w Pòlsce. Miała to bëc w pierszi rédze atrakcjô dlô dzecy, jaczé ceszëłë sã na widok pòjazdu swiécącégò jak danka. Latos równak akcjã mùszelë rëchli przerwac. Nakôzała to direkcjô Zarządu Miesczi Kòmùnikacje. Dochôdało do ni wiele skargów na gòdowi trolejbùs, bò lëdzóm lampczi z bùtna pòjazdu miałë przeszkadzac. Gôdelë midzë jinszima ò lëchi widocznoscë na drodze, ale téż ò tim, że taczi wëzdrzatk bùsa prosto jim sã nie widzy. Òkróm skargów do wëszëznów to dało téż wiele narzékaniô w Internece. Pòdjimizna Trolejbùsowi Kòmùnikacje zdecydowa sã ùsłëchac i zdjic òbwieszony trolejbùs z szasëjów. Òd wtórkù szestnôstégò gòdnika gòdowi trolejbùs mô wrócëc, ale terô lampczi bãdą wisałë blós bënë wòzu.

H.S.Sz.