Słëpskô zemia zagwësni wòdã dlô centrum przetwôrzaniô pòdôwków

Òkòla, gdze pòstawilë szlachòwné bùdinczi, ju płacą za to wësoczi priz. Za to Pòmòrzé zwëskô na prestiżu i môlach robòtë.

Pòdpisóny òstôł intencjowi lëst w sprawie pòstawieniô w słëpsczim krézu stolëmnégò centrum pòdôwków amerikańsczi wëcmaniznë Twenty20 Energy. Bùdink ë insfrastruktura òkòma niegò mają służëc przerôbianiémù cyfrowëch pòdôwków na ùżiwk ùsłëgów taczich jak ChatGPT i systémë sztëczny inteligencje Google czë Meta. Firma mô taczé centra pòstawioné w Zjednónëch Stanach i Pôłniowò-Wschódny Azje, a terô wchôdô téż do Eùropë. Jak zapòwiôdô òperacjowi direktór Mòrgan Knol, Pòmòrzé òsoblëwie scygô na sebie bôczenié firmë, z pòzdrzatkù na szeroczi przistãp do zdrojów zelony energie, industriową bazã, przistãp do robòtników a institucjów. To na Pòmòrzim mô téż w przińdnoce bëc ùsadzonô głównô sedzba eùropejsczégò partu wëcmaniznë. Ùdbónô je téż wespółrobòta z pòdjimarzama i ùczbòwniama. Dlô przëdstôwców gardu Słëpska, słëpsczégò krézu i pòmòrsczégò wòjewództwa, bëtnëch na pòdpisanim intencjowégò lëstu, ùsadzenié centrum przerobù pòdôwków na słëpsczi zemi to szansa na prestiż i zwësk przez ùsadzenié nowëch placów robòtë. Przëznôwają téż, że dzejanié taczi inwesticje òznôczô wëzwëskanié stolëmnëch wielënów zelony energie. W praktice òznôczô to zùżëcé słodczi wòdë, jakô je brëkòwónô do chłodzeniô przegrzéwającëch sã procesorów ò wiôldżi mòcë. Strzédné centra pòdôwków pòbiérają sztërësta szestnôsce miliónów sztërësta tësący litrów wòdë na rok – tëli co tësąc domôctwów. Wikszé centra cygną na rok do szesc miliardów òsmëset dzesãc miliónów litrów, tëli co gard wiôlgòscë Pùcka, Kòscérznë czë nawet Wejrowa. Ne wielënë mô przedstawioné amerikańsczi Institut Sztrzodowiszczowëch i Energeticznëch Sztudiów w rapòrce z czerwińca łońsczégò rokù. Jich badérowania wskazéwają téż, że òsmëdzesąt procent wòdë brëkòwóny przez te centra wësychô, a néga lądëje w scekach. 
Słëpskô zemia to dzysdnia jeden z niewiele môlów w Pòlsce, gdze ni ma wikszich jiwrów z sëszą. Żebë zjiscenié planów amerikańsczégò kòncernu a samòrządów tegò nie zmieniło, mùszałobë sã parłãczëc z wëzwëskanim technologiów do zaòbszczãdzeniô wòdë. Institut Strzodowiszczowëch i Energeticznëch Sztudiów wspòminô ò chłodzenim specjalnyma płënama, lëftã, abò téż wòdą w zamkłëch òbiegach. Twenty20 Energy zapòwiôdô zaczãcé robòtë nad inwesticją jesz latos.

H.S.Sz.