Reklama

Smôłdzëno òdrzucëło piãc miliónów na pòmòc dlô mieszkańców

Klëka

11/08/2025 10:28

Z Kaszëb, Smôłdzëno òdrzucëło piãc miliónów pòmòc mieszkańców - zdjęcie, fotografia

Ùrzãdnicë ùdżibnãlë sã pòd protestama mieszkańców, wedle jaczich jistnieje zagrôżba, że do gminë sprowadzony bë bëlë niebezpieczny migrancë.

Gmina Smôłdzëno ùdostała piãc miliónów złotëch z ùnijnëch strzódków na bùdacjã szesc wspòmôgónëch mieszkaniów dlô niefùlsprôwnëch i starszich òsób, równak pòtkania samòrządu z mieszkańcama Smôłdzëna ùjawniłë, że mieszkańcë są procëm. W ùstawie z dwanôstégò strëmiannika dwa tësące czwiôrtégò rokù ò spòlëznowi pòmòcë w piãcdzesątim trzecym artiklu je napisóné, że wspòmôgóné mieszkania mògą bëc téż dlô òsób ò statusu ùchódnika, a dlôte mieszkańcë bëlë dbë, że prawie dlô nich mieszkania bãdą stôwióné. Nie delë sã przëkònac tłómaczenióm, że w tim przëtrôfkù nen zapisënk je leno na papiorze, a gmina òd zôczątkù ùdbała so namienic mieszkania dlô sztërzech białków i dwùch chłopów ju òd dôwna żëjącëch w gminie. Na wiesczim zetkanim we strzodã szóstégò zélnika mieszkańcë cwierdzëlë, że nawetka przë dobri wòlë wójta Arkadiusza Walacha to Warszawa zadecydëje ò sprowadzenim do Smôłdzëna jaczich to niebezpiecznëch migrantów, chtërny nie bãdą rozmielë sã zasymilowac, a jesz zaszkòdzą turistice w gminie, z jaczi ta w przédny rédze sã ùtrzëmiwô. Gminny ùrzãdnicë z żalã zdecydowelë ò òdstąpienim òd inwesticje pò doznónym òd mieszkańców internetowim hejce a téż słownëch atakach, czej  wëchôdelë z dodomù abò kòscoła. Czerowniczka Gminnégò Òstrzódka Spòlëznowi Pòmòcë Martina Radzëk przekôzała, że Smôłdzëno bãdze jedurną gminą w całim pòmòrsczim wòjewództwie, jakô òdmówi przëjimniãcô tegò ùdëtkòwieniô.

H.S.Sz.

Czytaj nas w Google

Dodaj do Google

Źródło i opracowanie własne