Przez pòrt kòl gardu Bandar-Abbas przechôdô kòl òsmëdzesąt piãc procent irańsczich towarów. Miałë bëc tam chòwóné substancje do robieniô rakétowégò òpału.
W sobòtã dwadzestégò szóstégò łżëkwiata reno w pòrce irańsczégò gardu Bandar-Abbas nad Zwãżëną Hormùz doszło do wëbùchù, w jaczim zdżinãło co nômni sztërdzescë òsób, a renionëch bëło przeszło òsmëset. Na òdjimkach i nagraniach je widzec wiôldżi stôłp dëmù. Wëbùch dało czëc na òstrowie, jaczi je dwadzesce szesc kilométrów òd pòrtu. Wëbiło rutë w òknach i ùszkòdzëło czile bùdinków. Mieszkańcë dostelë òstrzédżi, żebë nie wëchadac z dodomów bez brëkòwnotë. Wëszëznë w Teheranie pòdôwają, że przëczëną béł òdżin w rëmach, gdze chòwóné bëłë chemikalia. Są téż nieòficjalné infòrmacje, że chòdzy ò nôdchlorón natrie (NaClO₄), jaczégò brëkùje sã do produkcje stałégò òpału do rakétów. Pò richtoscë miôłbë òn bëc zaklasyfikòwóny jakno niebezpiecznô substancjô, le wedle òperatora pòrtu Sajida Dżafarégò przë przëjimanim substancje bëłë pòdôwóné falszëwé impòrtowé deklaracje – nôdchlorón natrie fùnksnérowôł jakno zwëczajnô substancjô i béł skłôdowóny w lëchëch warënkach. Przékùje temù rzecznik Ministerstwa Òbarnë Iranu, jaczi cwierdzy, że nie bëło tam niżódnëch wòjskòwëch materiałów. Włôdze zbadérëją sprawã, le wstãpno wëłãcziwają mòżebnosc ùmëslnégò pòdpôleniô.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie