Pòjawienié sã cenczi wiôrztë sniegù òstało pòcwierdzoné we czwiôrtk. Direktną przëczëną bëło òsoblëwie gòrącé lato, ale barżi drobnotowé wërozmienia bãdze szło pòdac pò dalszich badérowaniach.
We strzodã 6. smùtana na czëpie górë Fùdżi, jednym z symbòlów Japòńsczi, òstôł zòczony pierszi latosy sniég. W czwiôrtk bëtnosc sniegù na górze òficjalno pòcwierdzëła japòńskô meteòrologicznô agencjô w Kofu, pò roznëkanim sã blónów, jaczé we strzodã zatacëłë wëzdrzatk i nie pòzwòliwałë na sprôwdzenié tëch donieseniów. Tim samim pòbiti òstôł rekòrd – je to nôpózdniészé pòkôzanié sã sniegù na Fùdżi òd nômni 130 lat, òd czedë badérowie prowadzą pòmiarë. Ùszłi rekòrd òstôł pòbiti w rokù 1955 a téż 2016 – tedë wiôrztã lodu bëło widzec 26 rujana. Zwëczajno sniég na Fùdżi pòkazéwô sã na zôczątkù rujana. W tim rokù w Japòńsce bëło òsoblëwie gòrącé lato, a temperaturë wëższé òd strzédnëch ùtrzëmiwałë sã téż w rujanie, w jaczim strzédnô temperatura na czëpie to bëło latos 1,6°C, czej colemało przez całi ten miesąc schôdô òna ju do -2°C.
Felënk sniegù na górze jiscył wiele lëdzy. Znajarze są dbë, że to jesz za wczas, żebë scwierdzëc, czë latosô stojizna mô związk z globalnym òceplenim.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie