Reklama

Somaliô òdmikô sã na suahili

Klëka

10/10/2025 11:42

Hassan Sheikh Mohamud; Villa Somalia - https://villasomalia.gov.so/en/the-presidency/the-president/

Suahili słëchô do dzesãc nôczãscy ùżiwónëch jãzëków na swiece, a we wschódny Africe mô sztatus midzënôrodnégò. Prezydent Somalie ògłosył, że zacznie òn bëc ùczony w szkòłach i na ùniwersytetach.

We wtórk sódmégò rujana na szczice Wschòdnoafrikańsczi Pòspólnotë w Mògadiszu prezydent Somalie Hassan Sheikh Mohamud ògłosył zjinaczi w  krajowi pòùczënie. Do szkół mô bëc wprowadzony jãzëk suahili, w czim doparłãczony bãdze do anielsczégò, jaczi terô trzimie górã, a téż arabsczégò. W grańcach Somalie rodnomówny brëkòwnicë suahili żëją na pôłniowim ùbrzegù, ale pòpùlarnosc tegò jãzëka dërch rosce òd czasów domôcy wòjnë w tësąc dzewiãcset dzewiãcdzesątim pierszim. Òd ni zaczął sã w Somalie cząd nieùbëtkù, czãstszé stało sã przekrôczanié grańcë z Kenią, gdze suahili je ùrzãdowim jãzëkã. Do te do kraju òstałë wësłóné wòjska Afrikańsczi Ùnie, czãsto midzë sobą gôdającé w ti gôdce. Prezydent Hassan Sheikh Mohamud zapòwiedzôł téż, że rząd bãdze dôwôł cësk na wëższé ùczbòwnie, cobë promòwac suahili. Gôdôł, że dzãka temù Somaliô mòże lepi sã zintegrowac z jinyma krajama wschódny Africzi. Wërazył nôdzejã, że na pòstãpnëch szczitach w somalijsczi stolëcë suahili bãdze rôz za razã wëpierac anielsczi z ùżëcô.

H.S.Sz.

Załączniki