Reklama

Spiérka ò piłã w Ritlu

Klëka

15/01/2026 16:35

Print screen ze starnë https://kronobuild.pl

Piła, jaczi miéwcą je niemieckò-aùstriacczi kòncern, chce trzë razë pòwikszëc wiéchrzëznã swòjégò zakładu. Bùrméster Czerska zwòłôł zéńdzenié dlô przediskùtowaniô kòntrowersjów.

W planie òglowégò rëmnégò zagòspòdarzeniô gminë Czersk nalôzł sã zapisënk ò zwikszenim wiéchrzëznë piłë, jakô dzejô w Ritlu. Dzysdnia zajimô dzesãc hektarów, a miabë zajimac trzëdzescë òsmë. Negatiwną òpiniã wëdelë lasewi w Nadlesyństwie Ritel, a Regionalnô Direkcjô Òchrónë Strzodowiszcza nijak nie ùzgòdniła dokùmentu, bò zapisënczi nie zagwësniwałë ùchòwaniô ùwôżaniô dlô rodë. Strach mają téż mieszkańcë Ritla, jaczi gôdają, że ju terô do piłë przëjéżdżô wiele cãżarowëch aùtołów, trzôsk hôlëje całą noc, a nad piłą je widzec òb noc wiôlgą gòrniã. Przez to je lãk, że pò zwikszenim wiéchrzëznë zakładu mdze jesz gòrzi.
Piła słëchô do firmë Kronospan, jakô mô lëchą òpiniã, jeżlë jidze ò pòszónowanié dlô nôtërnégò strzodowiszcza. Procëm dzejanióm ji zakładów protestowelë midzë jinszima w Walie, Szwarcwaldze i na Mazurach. Bùrméster Czerska Daniél Szprãga zwòłôł na piątk szesnôstégò stëcznika zetkanié z wëszëznama, przedstôwcama Kronospanu, lasewima, ekòlogama i mieszkańcama dlô òbgôdaniô sprawë. Bãdze òno w Dodomù Kùlturë w Ritlu ò szósti wieczór. Samòrządôrz pòdczorchiwô, że rozbùdowa piłë bëłabë wiôlgą szansą dlô gminë pò tim, jak w slédnëch latach òprzestałë tam dzejac zakładë meblowi ë miãsny. Gôdô równak, że nie ùpiérô sã przë terny pòstacje planu ë rechùje na brzadną diskùsjã.

H.S.Sz.

Źródło i opracowanie własne Aktualizacja: 15/01/2026 19:44