Reklama

Stanë wrôcają do testów nuklearny barnie

Klëka

31/10/2025 10:49

Aùtór: Shealah Craighead - https://www.whitehouse.gov/people/donald-j-trump/ (archive); zdrzódło: https://pl.wikipedia.org/wiki/Donald_Trump#/media/Plik:Donald_Trump_official_portrait.jpg

Ò swòji decyzje Trump dôł do wiadë na spòlëznowëch mediach. Cwierdzy, że jinszé kraje gònią Stanë w produkcje atomòwëch ladënków i jich testowanim.

We czwiôrtk trzëdzestégò rujana prezydent Zjednónëch Stanów Donald Trump napisôł na swòji spòlëznowi platfòrmie Truth Social, że kôzôł Departamentowi Wòjnë znowic próbë nuklearny barnie. Scwierdzył, że Amerika mô terô ji nôwicy, midzë jinszima dzãka renowacje ti, co amerikańsczé wòjskò jã miało ju za jegò pierszi prezydenturë. Drëgô je Ruskô, a wiele w tële jakno trzecé mają bëc Chinë, jaczé równak w piãc lat mògą nadgònic w produkcje. Decyzjã co do znowieniô testów Trump tłómaczi tim, że robią to téż jiné kraje. Narzesził tim do slédnëch testów rusczi rakétë Bùriewiestnik i torpédë Pòsejdón, jaczé mògą przenaszac nuklearné ladënczi. Òb czas tëch testów nie doszło do wëbùchów, a slédny krôj, jaczi dôł sã na detonacje atomòwi barnie w òbrëmim testów, to Nordowô Kòreja. Zrobiła to òstatno w dwa tësące sétmënôstim rokù, a rok pózdni ògłosëła mòratorium na taczé próbë. Zjednóné Stanë slédny atomòwi ladënk zdetonowałë w tësąc dzewiãcset dzewiãcdzesątim drëdżim. Nie je wiedzec, jaczé dokładno testë mô ùdbóné Trump.

H.S.Sz.