Reklama

Sto sztërdzescë trzë môłpë ùretóné òd szmùglowników

Klëka

16/11/2025 18:50

M. nigra. Aùtór: Bernard Dupont; zdrzódło: https://pl.wikipedia.org/wiki/Makak_(ssaki)#/media/Plik:Crested_Macaque_Macaca_nigra_(7911466406).jpg

W dwùch akcjach tajsczé służbë nie dopùscëłë do przewòzu makaków do Kambòdżë, gdze sprôwcë bë je przekôzelë nielegalnym hańdlarzóm zwierzãtama.

W piątk sztërnôstégò smùtana Departament Nôrodnëch Parków, Dzëwi Rodë i Òchrónë Roscënów Tajlandie dôł do wiadë, że w tajsczi prowincje Sa Kaeo niedalek grańcë z Kambòdżą służbóm ùdało sã zascygnąc dwie akcje szmùglowników. W òbëdwùch sprôwcë próbòwelë przewiezc do kambòdżë môłpë. Òb czas pierszi interwencje w distrikce Khlong Hat szandarzë ùczëlë krzikanié zwierzãt z pòla cëkrowi strzënë w jedny wsë. Na pòlu w nylonowëch miechach bëłë szescdzesąt dwie makaczi, jaczé nôgwësni chtos pózdni miôł zabrac i przewiezc za grańcã. W distrikce Aranyaprathet grańcznô starżô zatrzimała aùtół, chtëren próbòwôł przejachac przez strzënowé pòle, a bënë nalezlë òsmëdzesąt jeden makaków – te bëłë przewòżoné w miechach z amfetaminą. Czerowca i pasażéra przëznelë sã do nôleżnictwa do szmùglowny grëpë, jakô przedôwô zwierzãta na czôrnym rënkù w Kambòdżë. Ùretóné môłpë bëłë w lëchi stojiznie przez zamkniãcé w wąsczich miechach. Służbë dotëgòwałë je do retënkòwégò òstrzódka dlô dzëwëch zwierzãt w prowincje Chachoengsao.

H.S.Sz.