Stolaté dërżenia hindusczégò nacjonalizmù

Stowôra zainspirowała pòwstanié jedny z przédnëch pòliticznëch partiów i wspiarła wstąpienié na ùrząd ternégò premiérë Mòdiégò. Stolaté jistnieniô fejrëje w militarnym stilu.

Òd zôczątkù rujana w Indiach stolaté swòjégò jistnieniô fejrëje Rashtriya Swayamsevak Sangh – Nôrodnô Stowôra Òchòtników. Ta hinduskô religiowò-nacjonalisticznô òrganizacjô, przedstôwiającô sã jakô nôwikszô bùtenrządowô òrganizacjô na swiece, je przédną sëłą hindusczi nacjonalëznë, jakô zainspirowała midzë jinszima pòwstanié Indijsczi Lëdowi Partie, chtërny wódcą je dzysdniowi premiéra Narendra Mòdi. Szef rządu na ùroczëznie w Nowim Delhi we strzodã pierszégò rujana wëgłosył przemówienié dlô ùtczënia zasłëgów Stowôrë dlô kraju. Premiéra je zrzeszony z tą òrganizacją òd ósmégò rokù żëcégò. Na czwiôrtkòwi ùroczëznie w Nagpùrze, gdze Stowôra mô swòjã przédną sedzbã, bëło kòl trzë tësące òsmëset nôleżników – samëch chłopów, bò blós nëch òrganizacjô zrzesziwô. Òbserwatorzë zwrôcają bôczenié na to, że òrganizatorzë mielë starã ò militarną estetikã na ùroczëznie: Chłopi mielë na se stowôrné mùńdurë – to je biôłé kòszle, khaki bùksë i czôrné mùce – zebróny bëlë na rëmnym sztadionie, gdze wzãlë ùdzél w pòspólny mòdlëtwie i wësłëchelë przemòwë przédnika. Wódcą òrganizacje je Mohan Bhagwat, zgódno z tradicją rządzący dosmiertno z namienieniô ùprzédnégò wódcë. Òdpiérôł na ùroczëznie òbwinë ò dzelenié spòlëznë i promòwanié przëmòdżi, co czãsto dô je czëc ze starnë procëmników a téż przedstôwców mniészëznowëch religiowëch i etnicznëch grëpów. Mówił ò dłudżi tradicje spòlëznowi rozmajitoscë w Indiach. „Nimò apartnëch juwernotów, wszëtcë jesmë partama wikszi spòlëznë. Jesmë zjednóny jakno tak spòlëzna, jakno krôj, jakno kùltura i nôród” – gôdôł Bhagwat. Nimò tëch deklaracjów to z Nôrodną Stowôrą Òchòtników procëmnicë parłãczą taczé wëdarzenia jak zabicé Mahatmë Gandhiégò w tësąc dzewiãcset sztëdzestim ósmim rokù czë znikwienié szestnôscewiecznégò meczetu Babri w Ayodhye w tësąc dzewiãcset dzewiãcdzesątim drëdżim, co zjiscëło rëchawë w całim kraju i doprowadzëło do smiercë dwùch tësący òsób, a téż rëchawë i biôtczi hindusów z mùzelmanama w Gùdżarace w dwa tësące drëdżim.

H.S.Sz.