Reklama

Stolëca bez sztrómù, bùrméster grôł w tenisa

Klëka

09/01/2026 10:56

Òdj. Diego Delso; zdrzódło: https://pl.wikipedia.org/wiki/Berlin#/media/Plik:Reichstag,_Berl%C3%ADn,_Alemania,_2016-04-21,_DD_46-48_HDR.jpg

Służbë nie są gwës, chto pòdpôlił kable i sprawił nôwikszą awariã sztrómù w Berlënie òd kùńca wòjnë.

W sobòtã trzecégò stëcznika reno przez pòdpôlenié kablów w pôłniowëch dzélach Berlëna òprzestôł dochadac sztróm. Stracëło gò kòl sto tësący òdbiérców. Awariã ùprawilë dopiérze we strzodã sódmégò stëcznika. Bëła to nôdłëgszô przerwa w dotëgòwiwanim sztrómù w niemiecczi stolëcë òd kùńca drëdżi swiatowi wòjnë. Do mediów trafiłë wiadë, w jaczich do winë przëznała sã lewiznowô òrganizacjô Vulkangruppe z òbwinama ò terrorizm. Aktiwiscë chcelë wëłãczëc sztróm rządzącym i zaprotestowac procëm industrie kòpalnianëch òpałów. To wëznanié badérëje niemieckô wëdowiédzô, bò pòdezdrzéwóny są téż Ruscë. Co jinszégò równak terô zajimô Berlińczików. Bùrméster gardu Kai Wegner w sobòtã doznôł sã ò awarie i nimò to pòjachôł grac w tenisa. Òb weekend, czej gò pitelë ò to, co robił pò dostanim wiadë ò krizysu, gôdôł, że zarządzôł ze swòjégò bióra dzejaniama miesczich służbów. Dopiérze pòtemù ju w tidzeniu spitóny przez gazétã „Die Welt” tłómacził sã, że pò prôwdze jachôł na tenisa, żebë òczëszczëc głowã, le mòbilkã miôł całi czas włączoną i pò rozegrze zarô wrócył do robòtë. Pòstawã bùrméstra skritikòwałë òbie pòliticzné starnë w Berlënie. Wezwałë gò do ùstąpieniô ze stanowiszcza. Kôzôł mù do se przëjachac téż zarząd jegò partie, Chrzescëjańskò-Demòkraticzny Ùnie.

H.S.Sz.

Załączniki