Reklama

Stolëmnô szëdergawica jidze na Jamajkã

Klëka

28/10/2025 13:51

Pòzdrzatkòwi òdjimk. Jeff Schmaltz, MODIS Rapid Response Team, NASA/GSFC - http://visibleearth.nasa.gov/view_rec.php?id=7938

„Ni ma môlu, jaczi ùchòwie sã przed gòrzã ti bùrzë” – zapòwiôdô Evan Thompson z Jamajsczi Meteòrologiczny Służbë.

Na Karajibë przëszedł nadzwëkòwò mòcny huragan Melissa. W slédnëch dniach na Hajiti dwie òsobë zdżinãłë w òbsuwkù kòl Pòrt-au-Prince, jednégò starszégò chłopa zabiło zwróconé drzewò w Marigòt. Na Dominikanie pół milióna òsób stracëło przistãp do pitny wòdë, a rosce lëczba zgłoszonëch òfiarów zaleniów i spadiwającëch drzéw. Melissa równak jesz sã nie òbdała. W pòniedzôłk huragan mô wlezc pòmidzë Kùbã a Hajiti, a Jamajka mòże sã rëchtowac na nôwikszą szëdergawicã w historie kraju. Nôpózni we wtórk dwadzestégò ósmégò rujana reno bôłdzô nawiedzy òstrów z grozbą òd sétmëset do tësąc litrów deszczu na kwadratméter, sztorëmòwé wałë na trzë i trzë dzesąté métra na pôłniowim sztrądze, a téż trójnëch a chùtczich zaleniów i òbsuwków zemi. Krôj mùszi sã rechòwac z sygniãcym przez wiater chùtkòscë nawet dwasta piãcdzesąt dwùch kilométrów na gòdzënã, co je dosc, żebë pònikwic bùdinczi, pòwërëwac drzewa z kòrzeniama i na tidzenie òdcyc przistãp do mediów. Przë tim wszëtczim sóm òbjim szëdergawicë baro wòlno sã rëchô pò Karajibsczim Mòrzu, blós sétmë kilométrów na gòdzënã, co znaczi, że jak wiater rôz przińdze, nie ùstąpi z Jamajczi chùtkò. Rząd wzéwô mieszkańców do ùżëcô wszelejaczich métlów zabezpieczeniô swòjégò miectwa. Òd sobòtë wieczór latawiszcza są na całim òstrowie pòzamikóné. Bòlëce pòòdwòłiwałë ùgôdóné wizytë i zabiedżi, żebë zagwësnic plac dlô pòszkòdowónëch w nadchôdający katastrofie. Rząd kôże traktowac òstrzédzi baro pòwôżno, a meteòrologiczné służbë pòdsztrichiwają, że niżóden môl w kraju przed Melissą sã nie ùchòwie.

H.S.Sz.