Reklama

Strategiô kartësczégò krézu na promòcjã kaszëbiznë

Klëka

02/11/2025 09:27

Wiedno gòrzi kartësczi kréz wëpôdô, jeżlë jidze ò kaszëbsczi w wëżispòdlecznëch szkòłach. Òd przińdnégò rokù pòmòc w tim mògą midzë jinszima stipendia dlô ùczniów.

Na slédnym zéńdzenim Radzëznë Kartësczégò Krézu òbgôdónô bëła téma stojiznë kaszëbsczégò w wëżispòdlecznëch szkòłach. Latos ùczbë kaszëbsczégò mô leno sztërdzescë ùczniów z tëch szkòłów: Dwadzesce dzewiãc w Karnie Òglowòsztôłcącëch Szkòłów przë szasëje Klôsztorny w Kartuzach i jednôsce w Krézowim Karnie Szkòłów w Przedkòwie. Łoni na kaszëbsczi w wëżispòdlecznëch szkòłach chòdzëło piãcdzesąt szesc òsób. Radny Łukôsz Grzãdzëcczi wskôzôł, że to wiele mni jak na przëmiar tëch, co sã ùczą szpańsczégò, a je jich piãcset òsmëdzesąt. Eùgeniusz Prëczkòwsczi zabédowôł inwesticjã w szkòlenié nowëch szkólnëch na Kaszëbsczim Lëdowim Ùniwersytece we Wieżëcë. Paùel Kòwalewsczi gôdôł ò tim, co kréz robi dlô rozkòscérzaniô kaszëbiznë, na przëmiar że direktórka Wëdzélu Edukacje Jolanta Tersa ju mô gôdóné z direktorama szkòłów, żebë zachãcywelë szkòlôków do zapiséowaniô sã na kaszëbsczi. Dlô tëch, co bãdą chòdzëlë, starosta Bògdón Łapa òbiecôł specjalné stipendium, jaczé zarządzëna krézu chce wprowadzëc òd stëcznika. Padłë téż bédënczi òrganizacje diskùsjowégò panelu ò szerok rozmióny kaszëbiznie czë wprowadzenié znajomòtë tegò jãzëka jakno wëmôganiô do robòtë w Krézowim Starostwie.

H.S.Sz.