Reklama

Òstrzéga przed klôsztornicama

Klëka

20/01/2026 09:55

Mònastir swiãti Elżbiétë w Mińskù. Òdj. Ak1976; zdrzódło: https://pl.wikipedia.org/wiki/Monaster_%C5%9Bw._El%C5%BCbiety_w_Mi%C5%84sku#/media/Plik:St_Elizabeth_Monastery_1997_1.jpg

Mònastir swiãti Elżbiétë miôł brac ùdzél w rozkòscérzanim pòpiarcô dlô dzejaniów rusczich wòjsków na Ùkrajinie.

Kòscół Szwédzczi wëdôł do katolików i prawòsłôwnëch òstrzéga przed sostrama z Mònastiru swiãti Elżbiétë w Mińskù. Biôłorusczé klôsztornice w gòdnikù òdwiedzëłë dwadzesce parafiów w Szwédzce. Tam na przedgòdowëch jôrmarkach przedôwałë dewòcjonalia, a zwësk miôł jic na charitatiwné céle. Òkôzało sã równak, że dëtczi pòszłë na rusczich żôłnérzów na Ùkrajinie. Sostrë prowadzëłë téż propagandã pòpiérającą tak pòzwóną specjalną wòjskòwą òperacjã. To samò zgromadzenié w dwa tësące dwadzestim drëdżim dostało zôkôz dzejaniô kòl katédrë w Winchesterze w Anielsce, prawie za proruską propagandã. Sostrë òdwiédzałë téż rusczé wòjskò na Ùkrajinie, a w Biôłorusce chòdzëłë w procesjach pòpiarcô dlô Aleksandra Łukaszenczi. Pasturzë, jaczi przëjimelë i rôczëlë klôsztornice do parafiôw, gôdelë, że ni mielë swiądë ò jich pòliticznym zaangażowanim. Kòscół Szwédzczi przestrzégł téż òglowò przed ùprzëstãpniwanim placu przedstôwcóm Rusczi Cerkwie. Wëszëznë sprôwdzają wespólnotã òkòma nowò wëbùdowóny cerkwie Matczi Bòsczi Kazańsczi w Västerås kòl Sztokholmù. Służbë docygają, że ùkriwają sã tam szpiónowie, jaczi pòdzérają latawiszcze w Västerås. Ambasada Rusczi Federacje w Sztokholmie gôdô, że nic ò taczich dzejaniach nie wié.

H.S.Sz.

Załączniki