Piãcminutowi atak to pòstãpny przëmiar zmòcniwający sã agresje midzë szijitama a sunnitama w regionie.
We czwiôrtk 21. smùtana w pakistańsczim regionie Kurram w prowincje Chajber Pasztunchwa na nordowim zôpadze kraju doszło do òstrzélaniô dwùch kònwòjów w eskòrce pòlicje z szijicczima pielgrzimama, przewòżącyma jich midzë gardama Peszawar a Parachinar. Nômni 42 lëdzy zdżinãło, a kòl 20 òstało renionëch. Òstrzélania dérowałë kòl 5 minut. Doszło do nich w parce kraju, gdze w slédnëch miesącach òstro zaòstrził sã sztrid midzë plemionama wëznôwającyma szijicczi islam, a tima òstôwającyma przë sunnicczim islamie. Karna stojącé za biôtkarsczima skrzidłama òbëdwùch wëznaniów dopùszcziwają sã colemało krëwawëch ataków. Jesz niżódna z tëch grëpów nie przëznała sã do ataku na pielgrzimów. Kurram, jakno szijicczi región, apartni sã òd wikszoscë Pakistanu, gdze górã mô sunnizm.
Môlowé szijicczé spòlëznë mają ùdbóné pùbliczné protestë w Parachinarze. Chcą zażãdac lepszi òbarnë przed atakama fanatików, tak żebë mòglë bez strachù ò swòje żëcé praktikòwac swòjã religiã i tradicje. Szlachòwné manifestacje bëłë ju tam òrganizowóné w tim miesącu, w reakcje na pòwtôrzającé sã mòrdarstwa tak na żôłnérzach jak na cywilach.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie