Reklama

Strzélinga na chanuce w Sydney

Klëka

15/12/2025 19:41

Ze swiata, Strzélinga chanuce Sydney - zdjęcie, fotografia

Òjc i syn zaczãlë strzelac na slepò do lëdzy pòzeszłëch na żëdowsczé swiãto. To nôtragedniészé taczé zdarzenié w Aùstralie òd wnet trzëdzescë lat.

Na òbchòdach żëdowsczégò swiãta chanuczi na pieglëszczu Bòndi w Sydney w Aùstralie doszło do strzélindżi. Wëszëznë gôdają ò terroristicznym atakù na antisemicczim spòdlim. Dwaji atakòwnicë brëkùjącë szesc sztëk dłudżi barnie zabilë piãtnôsce òsób. Mierzelë na slepò do zgromadzonëch – jeden strzélc stojôł na mòstkù kòl parkingù, a drëdżi czerowôł sã krodzy w starnã lëdzy. Nômłodszô òfiara bëła dzesãc lat stôrô, nôstarszô òsmëdzesąt szesc. Sztërdzescë czile òsób, w tim dwùch szandarów, je w bòlëcë, ale wiele z nich je w kriticzny stojiznie, tej leczba smiertnëch òfiarów mòże ùrosc. Atakòwnicë to piãcdzesątlatny òjc, zabiti na placu przez służbë, i jegò dwadzescesztërëlatny syn, jaczi cãżkò przez nie reniony je w bòlëcë. Òjc miôł zezwòlenié na szesc sztëk barnie. W òkòlim pieglëszcza nalazłé òstałë téż wëbùchòwé ladënczi, jaczich sprôwcë równak nie òdpôlëlë. Jednégò z atakòwników ùskrzënił miéwca krómù z brzadã Ahmed al Ahmed, jaczi zabrôł mù barniã – drëdżi atakòwnik pòstrzelił pózdni herojã w rãkã i nogã. Òdwôga chłopa pòzwòlëła ùniknąc wiele wicy òfiarów i pòmògła służbóm rëchli ùdostac strzélców.

H.S.Sz.