Reklama

Strzélinga we wiesczi szkòle w Kanadze

Klëka

12/02/2026 19:22

Môl strzélindżi. Zdrzódło: https://en.wikipedia.org/wiki/2026_Tumbler_Ridge_shooting#/maplink/0

Chùtczi przëjôzd szandarów pòzwòlił strzëmac zabijanié. Sprôwca miôł jiwrë z psychicznym zdrowim.

W Tumbler Ridge w Britijsczi Kòlumbie w Kanadze doszło do strzélindżi w strzédny szkòle. We wtórk dzesątégò gromicznika Królewskô Kanadijskô Kònnô Pòlicjô dostała pół drëdżi pò pôłnim wiadã ò atakù z ùżëcym strzélny barnie. Na placu bëlë ju w dwie minutë, co wedle jich rzecznika pòzwòlëło ùretac żëcé wiele òsobóm. Przed jich przëjazdã zastrzeloné òstało piãc szkòlôków w wiekù òd dwanôsce do trzënôsce lat i jedna trzëdzescë dzewiãc lat stôrô szkólnô. Dwadzesce piãc òsób òb czas strzélindżi bëło zrenionëch, ale nié òd kùlów. W bùdinkù szandarzë nalezlë téż cało òsmënôsce lat stôrégò atakòwnika, dôwnégò szkòlôka, chtëren sóm sã zastrzelił pò jich przëjezdze. Ù niegò doma trafilë pòstãpné dwie òfiarë – trzëdzescë dzewiãc lat stôrą matkã i jednôsce lat stôrégò brata. Sprôwca to mieszkańc môlëznë, Jesse Van Rootselaar. Òstawił szkòłã sztërë lata dowsladë. Pòlicjô znała gò òd lat, bò przëjéżdżelë do niegò dodóm w związkù z jegò zachòwaniama na spòdlim psychicznëch jiwrów. Òd kòl szesc lat identifikòwôł sã jakno białka. W ùszłoce miôł pòzwòlenié na strzélną barniã, ale òno wëgasło. Jegò mòtiw nie je znóny. Kanadijsczé wëszëznë i pùblicznô òpiniô bëłë zaskòknioné atakã, bò doszło do niegò na wiesczi òbéńdze. W Tumbler Ridge żëje kòl dwa tësące sztërësta mieszkańców, a do strzédny szkòłë chòdzëło sto szescdzesąt szkòlôków.

H.S.Sz.

Źródło i opracowanie własne