Stãżëca pałacã królewiónczi

Zwiédzanié, integracjô i riwalizacjô żdałë na ùczãstników Kaszëbsczégò Diktanda w Stãżëcë. Za rok pòtkają sã na Zôbòrach.

W sobòtã dwadzestégò drëdżégò smùtana lubòtnicë kaszëbiznë nié blós z Kaszub zjachelë sã do Stãżëcë. Tam zrëchtowóné bëło dwadzesté czwiôrté Kaszëbsczé Diktando „Królewiónka w Pałacu”. Latosé tekstë bëłë wzãté z ùtwórstwa Jerzégò Sampa i jegò òbrobieniów. Rozegracjã na Spòrtowò-Widzawiszczowi Halë kòl Karna Sztôłceniô i Wëchòwaniô w Stãżëcë òd rena prowadzëła Ana Cupa. Zebrónëch przëwitelë przedstôwcë Kaszëbskò-Pòmòrsczégò Zrzeszeniégò i gminë Stãżëca a téż pòmòrsczi pòliticë. Przed zaczãcym diktanda przëznóné bëłë nôdgrodë za nôlepi napisóné maturë z kaszëbsczégò jãzëka – dobiwcą pierszégò placu òstôł Szczepón Makùrôt. Pò pierszim etapie kònkùrsu, w jaczim ùdzél wzãło wnet dwasta ùczãstników, zrëchtowóné bëłë rozmajité atrakcje, jak zwiédzanié Pùbliczny Bibloteczi w Stãżëcë, dwòrkù Wëbicczich w Sëkòrzënie czë Centrum Edukacje i Promòcje Regionu w Szimbarkù. Pòdkarszniony pôłnim ùczãstnicë doznelë sã, chto sã dostôł do pòstãpnëch etapów, a pòtemù pòszlë sã spróbòwac z finałowim tekstã. Żdżącë na finał rozegracje, mielë jesz czas pòsłëchac wëstãpów karna Bùten Szëkù i Wëroniczi Kòrthals razã z dzecnym zespołã Norda Kids, a téż wzyc ùdzél w prowadzonym przez Grégòra Schramkã pòtkanim ò nowi pùblikacje czerowóny do szkólnëch aùtorstwa Dariusza Majkòwsczégò i Marka Cëbùlsczégò, w jaczi wëwidnioné je, jak bëlno pisac pò kaszëbskù. W kùńcu kòmisjô pòdała miona dobiwców. W swòjich kategòriach, òd nômłodszich do nôstarszich i warkòwëch, pierszé place pòzajimòwelë Malwina Kropidłowskô, Hanna Kòssak-Główczewskô, Mikòłôj Drewczińsczi, Witosława Dzemińskô, Iwò Miszkòwiôk i Karól Krefta. Winszëjemë dobiwcóm, a przekazéwómë téż, że dwadzestô piątô edicjô Kaszëbsczégò Diktanda bãdze za rok wew Brusach.

H.S.Sz.