Na sto òsmëdzesąt krajów sztërdzescë mô zbùdowóné gwôsné pawilonë. Wkòł wszëtczich Japòńczicë pòstawilë stolëmny piestrzéń z cedrowégò drzewa.
W sobòtã dwanôstégò łżëkwiata na sztëcznym òstrowie Yumeshima w Òsace bëła ùroczëzna òdemkniãcô latoségò Swiatowégò Wëstôwkù Expo, na jaczim wnetka sto òsmëdzesąt państwów, teritoriów i midzënôrodnëch òrganizacjów pòkôże swòje dobëca w technice, industrie i geszefce. Mòttã latoségò Expo je „Projektowanié spòlëznë przińdnotë dlô najich żëców”. Na òdemkniãcym premiéra Japònie Shigeru Ishiba gôdôł ò nowëch wëzwaniach dlô swiata; òb czas slédnégò Swiatowégò Wëstôwkù w Dubaju piãc lat nazôd wëzwanim bëło pòszëdło kòronawirusa, a dzysdnia swiat biôtkùje z pòdzélënkama midzë nôrodama. Przemôwiół téż césôrz Naruhito, chtëren gôdôł ò nôdzeji na to, że Wëstôwk stónie sã leżnoscą dlô lëdzy z całégò swiata, żebë mielë w ùwôżanim żëcé nié blós swòje, le téż drëdżich. Na całi ceremònie, òbòniony artisticznyma wëstãpama, bëło kòl tësąc trzësta sztëk lëdzy. Taksëje sã, że do kùńca Expo latos w rujanie do Òsaczi przëjedze gò òbaczëc kòl dwadzescë òsmë miliónów lëdzy. To drëdżi rôz, jak ten gard gòscy Swiatowi Wëstôwk – Òsaka bëła ju jegò gòspòdarzã w tësąc dzewiãcset sétmëdzesątim rokù.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie