Żôłtëszczi a kònie, trekrë i kómbajnë, kwiatë do ògardu, dzyrżnicë, Francesco Napòli, firmë òd fòtowòltajiczi i pòliticë – to wszëtkò szło òbezdrzec na latosëch Pòmòrsczich Agro Targach w Lubaniu.
W weekend sódmégò i ósmégò czerwińca w Lubaniu w gminie Nowô Karczma na terenie Pòmòrsczégò Òstrzódka Gbùrzëznowégò Dorôdztwa bëłë zrëchtowóné trzëdzesté drëdżé Pòmòrsczé Agro Tardżi, nôwikszé taczé gbùrzëznowé wëdarzenié na Pòmòrzu. Swòje geszeftë przedstawiło przez òsmëdzesąt firmów zajimającëch sã gbùrzëzną, a do tegò producencë òzdobnëch roscënów, chòwôcze zwierzãt czë przedstôwcë firmów bédëjącëch Òdnôwialné Zdroje Energie. Przëszłi na wëdarzenié mielë téż leżnosc òbezdrzec pòkôzk kòni, pòkôzk dzyrżników, wzyc ùdzél w kònkùrsach ò ekòlogie, a téż pòsłëchac kòncertów biesadnëch, dãti òrkestrë czë gwiôzdë italo disco Francesco Napòlégò. Wôżnym wëdarzenim bëła téż kònferencjô ò Strategicznym Planie Pòspólny Gbùrzëznowi Pòliticzi na lata dwa tësące dwadzesce trzë – dwa tësące dwadzesce sétmë. Przejachónëch ùgòscëła téż lubańskô parafiô, w jaczi kòscele òdprawionô bëła mszô za gbùrów, chòwôczów i wëstôwców.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie